Sudanın Əl-Faşer şəhərinin qərbində yerləşən Tavila, Kurma və Qolo qaçqın düşərgələrində humanitar vəziyyət xeyli pisləşir.
Aznews.az xəbər verir ki, bununla bağlı "Sudan Həkimlər Şəbəkəsi" "X" sosial şəbəkəsində xəbərdarlıq edib.
Həkimlərin məlumatına görə, bu düşərgələr 26 oktyabrda Sürətli Müdaxilə Qüvvələri (SMQ) tərəfindən ələ keçirilən Əl-Faşerdən qaçan insanların əsas məkanlarına çevrilib. "Bu, onsuz da məhdud resurslara böyük təzyiq göstərir və köçkünlərin əzablarını daha da artırır. Vəziyyət düşərgənin tutumunu genişləndirmək və qaçqınların əsas ehtiyaclarını təmin etmək üçün təcili müdaxilə tələb edir", - onlar qeyd ediblər.
Statistikaya görə, son günlər on minlərlə insan Əl-Faşerdən qaçıb. Humanitar və insan haqları təşkilatları Sürətli Müdaxilə Qüvvələri kütləvi qətllər, cinsi zorakılıq və şantaj da daxil olmaqla müxtəlif cinayətlər törətməkdə ittiham edir.
"Sudan Tribune" qəzeti iddia edir ki, cəmi bir neçə gün ərzində Tavila düşərgəsinə güllə yarası alan 1 300 nəfər gəlib. "Sudan Həkimləri Şəbəkəsi" öz növbəsində qeyd edib ki, Əl Faşerdən olan bir neçə nəfər yalnız çərşənbə axşamı günü Qolo düşərgəsinə ağır vəziyyətdə gəlib.
