Əfqanıstan: ABŞ dronları hava məkanımızı pozur
Əfqanıstan hökumətinin sözçüsü Zəbihullah Mücahid hava məkanının ABŞ pilotsuz uçuş aparatları (PUA) tərəfindən pozulduğunu və bunların Pakistan ərazisindən gəldiyini iddia etdi.
Mücahid Tolo News-a bildirib ki, İstanbuldakı danışıqlar zamanı Pakistan Əfqanıstan ərazisinin onlara qarşı istifadə edilməməsini tələb edib və onlar da eyni şəkildə Pakistan ərazisi və hava məkanının Əfqanıstana qarşı istifadə edilməməsini tələb ediblər.
"Düzünü desəm, Amerika dronları Əfqanıstan səmasında fəaliyyət göstərir, Pakistan hava məkanından keçir və hava məkanımızı pozur", - deyə Mücahid bildirib və əlavə edib ki, onlar Pakistandan bunun qarşısını almağı xahiş ediblər.
Mücahid bildirib ki, Doha və İstanbuldakı danışıqlarda Əfqanıstan və Pakistan arasında həll olunmamış yeganə məsələ Pakistan Talibanı (TTP) olub. O, əlavə edib ki, İslamabad hökuməti Əfqanıstan hökumətindən TTP-nin Pakistan daxilindəki fəaliyyətinə nəzarət etməsini istəyib və əlavə edib ki, bu tələb Kabilin yurisdiksiyasından kənardır.
ABŞ-ın rəhbərlik etdiyi koalisiya qüvvələri tərəfindən 2001-ci ildə Əfqanıstana işğal edildikdən sonra yerləşdirilən və ABŞ prezidenti Donald Trampın geri almağı planlaşdırdığı ən böyük hərbi baza olan Baqram Hava Bazası ilə bağlı Mücahid, bazaya nəzarət etmək ambisiyası olan və ya bir vaxtlar Əfqanıstanla ziddiyyətdə olan bəzi qrupların təzyiq və təxribat yolu ilə bölgədə qeyri-sabitlik yaratmağa çalışdığını qiymətləndirdi.
Pakistan və Əfqanıstan arasında gərginlik
Pakistan və Əfqanıstan arasında sərhəd toqquşmalarından sonra 15 oktyabrda 48 saatlıq atəşkəs elan edildi və Türkiyə və Qətərin dəstəyi ilə Qətərin paytaxtı Dohada tərəflər arasında aparılan danışıqların başa çatmasına qədər uzadıldı.
Prezident Rəcəb Tayyib Ərdoğanın tapşırığı ilə Doha danışıqlarında Milli Kəşfiyyat Təşkilatının (MİT) direktoru İbrahim Kalın da iştirak etdi.
Danışıqların əsas gündəliyi "mövcud atəşkəsin uzadılması və son sərhəd toqquşmalarının həlli" idi və tərəflər razılığa gəldilər.
Dohada 14 saatlıq danışıqlardan sonra atəşkəsin hazırlanması üçün texniki komitənin ilk iclasının İstanbulda keçirilməsi qərara alındı.
Pakistan və Əfqanıstan nümayəndə heyətləri bu məqsədlə 25-30 oktyabr tarixlərində İstanbulda görüşdülər.
aia.az
Tərcümə şöbəsi
