Azərbaycanın bank sektorunda problemli istehlak kreditlərinin həcmi sentyabrın 1-nə 310,2 milyon manat təşkil edib. Bu seqmentdə son bir ayda azalma qeydə alınsa da, illik perspektivdə kəskin artım davam edir.
FED.az Mərkəzi Bankın statistikasına istinadən xəbər verir ki, bu, ötən ilin eyni dövrü ilə müqayisədə 56,7 milyon manat və ya 22,4% artım deməkdir.
Belə ki, ötən ilin sentyabrın 1-nə vaxtı keçmiş istehlak kreditlərinin həcmi 253,5 milyon manat idi.
Portfelin digər dövrlər üzrə dinamikası da diqqət çəkir. Ötən ilin sonuna (246,3 mln. manat) nəzərən problemli kreditlər 63,9 milyon manat (26%) artıb. Lakin son bir ayda (avqusta nəzərən) portfeldə 1,4 milyon manat (0,4%) azalma baş verib.
Xatırladaq ki, problemli istehlak kreditləri portfeli ötən ilin eyni dövründə 253,5 milyon manat, ötən ilin sonunda 246,3 milyon manat, bu ilin avqustun 1-də isə 311,6 milyon manat idi.
Vaxtı keçmiş kreditlərin ümumi istehlak kreditləri portfelindəki payı isə sentyabrın 1-nə 3,4% təşkil edib. Bu, ötən ilin eyni dövrü (3,2%) ilə müqayisədə 0,2 faiz bəndi, ötən ilin sonu (2,9%) ilə müqayisədə isə 0,5 faiz bəndi pisləşmə deməkdir. Bununla belə, son bir ayla (3,5%) müqayisədə portfelin keyfiyyəti 0,1 faiz bəndi yaxşılaşıb.
