Gəncədə MDB Oyunlarının açılış mərasimi keçirildi

Gəncədə 3-cü MDB Oyunlarının təntənəli açılış mərasimi keçirilib.

"Football-plus.az" xəbər verir ki, Azərbaycan Respublikasının Prezidenti İlham Əliyev və birinci xanım Mehriban Əliyeva tədbiri izləyiblər.

Əvvəlcə Azərbaycan Respublikasının üçrəngli Bayrağı arenaya gətirilib və Dövlət Himnimizin sədaları altında ucaldılıb.

Sonra 3-cü MDB Oyunlarında iştirak edən ölkələrin idmançılarının təntənəli paradı olub.

Açılış mərasimində Azərbaycan Bayrağını karateçimiz Asiman Qurbanlı və taekvondoçumuz Zemfira Həsənzadə arenaya gətiriblər.

Sonra 3-cü MDB Oyunlarının Təşkilat Komitəsinin sədri Samir Şərifov və Müstəqil Dövlətlər Birliyinin Baş katibinin müavini Nurlan Seytimov çıxış ediblər. Daha sonra idmançıların və onların məşqçilərinin andiçmə mərasimi olub. Azərbaycan Respublikasının Prezidenti İlham Əliyev 3-cü MDB Oyunlarını açıq elan edib.

Tədbir bədii hissə ilə davam edib.