BAKI,TurkicWorld, Fərid Mikayılov
ABŞ Prezidenti Donald Tramp bu gün Ağ Evdə Türkiyə Prezidenti Rəcəb Tayyib Ərdoğanla görüşəcək.
TurkicWorld xəbər verir ki, Tramp administrasiyası Ankaraya F-35 qırıcılarının satışına qoyulan qadağanın qaldırılmasını nəzərdən keçirir.
ABŞ 2019-cu ildə Türkiyəni Rusiyadan S-400 hava hücumundan müdafiə sistemi aldığına görə F-35 proqramından çıxarmışdı. Vaşinqton bu alımın F-35 texnologiyasının Moskvaya ötürülməsi riskini daşıdığını bildirmişdi.
Tramp isə ötən həftə Ərdoğanın səfərini elan edərkən, məsələni müsbət yöndə həll etməyə yaxın olduqlarını açıqlayıb:
“Prezidentlə bir çox ticarət və hərbi sazişlər üzərində işləyirik. Boeing təyyarələrinin iri həcmli alınması, böyük F-16 müqaviləsi və F-35 danışıqlarının davamı gündəmdədir. F-35 mövzusunu da müsbət nəticələndirməyi gözləyirik,” — deyə Tramp sosial mediada hesabında yazıb.
Ərdoğanın 2019-dan bəri ilk dəfə gerçəkləşəcək Ağ Ev səfəri ABŞ-Türkiyə münasibətlərində yeni mərhələyə işarə edir.
Türkiyə rəsmiləri ölkənin F-35 proqramına 1,4 milyard dollar ödəniş etdiyini vurğulayır və qadağanın aradan qaldırılmasını tələb edir.
Görüşdə həmçinin Suriya, Ukrayna və Qəzza müharibəsi də müzakirə ediləcək. Tramp administrasiyası Ərdoğanın Suriya ilə bağlı mövqeyi və Qara dənizdə vasitəçilik cəhdlərini önəmli hesab edir. Türkiyə həm Ukrayna, həm də Rusiya ilə əlaqələri qoruyaraq bölgədə balanslı oyunçu rolunu oynayır.
Görüş, ABŞ-Türkiyə münasibətlərində təhlükəsizlik, enerji və ticarət əməkdaşlığına dair yeni yol xəritəsinin müəyyənləşdirilməsi baxımından önəmli olacaq.
