Şəhərdə uçuşlar bərpa olunub, ictimai xidmətlər və məktəblər yenidən fəaliyyətə başlayır...
Poliqon xəbər verir ki, Honq-Konqda baş verən güclü “Raqasa” tayfunu nəticəsində 100-dən çox sakin müxtəlif dərəcəli xəsarətlər alıb. Təbii fəlakət zamanı şəhərdə fövqəladə təhlükə elan olunub və hakimiyyət orqanları ən yüksək təhlükəsizlik səviyyəsini tətbiq edib.
Tayfun səbəbindən Honq-Konq Beynəlxalq Hava Limanında bütün uçuşlar 36 saat müddətinə dayandırılıb. Bu gün səhər saatlarından etibarən hava limanı fəaliyyətini bərpa edib, həmçinin şəhərdə müəssisələr, ictimai nəqliyyat xətləri və bəzi məktəblər normal iş rejiminə qayıdıb. Şəhər xidmətləri küçələri yıxılmış ağaclardan və dağıntılardan təmizləməyə davam edir.
Honq-Konq Rəsədxanasının məlumatına görə, “Raqasa” bu il Cənubi Çin dənizi hövzəsində qeydə alınan ən güclü tayfundur. Eyni zamanda, 1950-ci ildən aparılan meteoroloji müşahidələrə əsasən, bölgədə qeydə alınan ən güclü ikinci təbii fəlakət hesab olunur. Statistikaya görə, son onilliklərin ən dağıdıcı tayfunları sırasında “Raqasa” ilə yanaşı, 2023-cü ildəki “Saola” və 2024-cü ildəki “Yaği” də yer alır.
Mütəxəssislər qeyd edirlər ki, iqlim dəyişikliyi nəticəsində Cənubi-Şərqi Asiyada tayfunların intensivliyi və dağıdıcılıq gücü getdikcə artır. Bu da bölgədə yaşayan milyonlarla insan üçün daha böyük təhlükə yaradır.
Poliqon.info
