Amerikalı milyarder investor Uorren Baffetin (Warren Buffett) investisiya şirkəti "Berkshire Hathaway" Çinin elektrikli avtomobil istehsalçısı BYD-dəki bütün səhmlərini satıb. Satışdan sonra şirkətin səhmləri 3,6%-dək ucuzlaşaraq son üç həftənin ən kəskin enişini qeydə alıb.
Marja xəbər verir ki, Hong Kong birjasında ticarət olunan Çin səhmləri arasında ən zəif göstəricilərdən birinə imza atan BYD, bazarda diqqət mərkəzinə çevrilib. Şirkətin sözçüsü də Berkshire Hathaway-in BYD-dəki bütün paylarını satdığını təsdiqləyib.
Buffett-in şirkəti ilk dəfə 2008-ci ilin sentyabrında 225 milyon səhm alaraq BYD-yə sərmayə yatırmışdı və bu səhmləri 15 ildən artıq müddətdə əlində saxlamışdı. Səhmlər həmin dövrdən 2025-ci ilin 31 martınadək 4 500%-dən çox dəyər qazanmışdı.
Son 20 ildə BYD kiçik telefon batareyası tədarükçüsündən Çinin ən iri elektrikli və hibrid avtomobil istehsalçısına çevrilib. "Berkshire" isə 2022-ci ilin ortalarından etibarən paylarını satmağa başlamış, ötən il isə səhmdəki payı 5%-dən aşağı enmişdi. Payın bu həddən aşağı düşməsi =ABŞ şirkətini gələcək satışlar barədə Honq Konq Birjasına məlumat vermək öhdəliyindən azad etmişdi.
Digər tərəfdən, BYD-nin səhmləri dörd ay əvvəlki tarixi ən yüksək səviyyəsində təxminən 30% aşağı enib. Buna səbəb Çində davam edən qiymət rəqabətinin şirkətin bazardakı mövqeyini qoruyub-qoruya bilməyəcəyi ilə bağlı narahatlıqlar olub.
BYD-nin İctimaiyyətlə Əlaqələr və Brend direktoru Li Yunfei sosial şəbəkədə paylaşım edərək, səhmlərin alqı-satqısının normal bazar prosesi olduğunu vurğulayıb:
“Charlie Munger və Warren Buffett-ə BYD-yə göstərdikləri 17 illik dəstəyə və dostluğa görə minnətdarıq”.
