İrəvanda keçirilən yürüşdən sonra Daşnaksütyun Partiyasının nümayəndəsi İşxan Saqatelyan hökumətə qarşı sərt bəyanatla çıxış edib. O, baş nazir Nikol Paşinyanı "dördüncü respublika" modelini reallaşdırmağa cəhd göstərməkdə günahlandırıb və bunu "Türkiyə-Azərbaycan proqramının son mərhələsi" adlandırıb. Saqatelyan iddia edib ki, Paşinyan Qarabağı dağıtdıqdan sonra indi də "üçüncü respublikanı" məhv etməyə hazırlaşır.
Terrorçu təşkilatın təmsilçisi deyib ki, baş nazir Azərbaycanın tələb etdiyi konstitusiyanı qəbul etməyə, Ermənistanı keçmişindən və "erməni xalqının hüquqlarından" imtina etməyə məcbur etmək niyyətindədir. Onun sözlərinə görə, bu proqram yalnız Paşinyan yenidən seçilmədiyi halda və referendum yolu ilə konstitusiyanı dəyişmək cəhdi baş tutarsa, reallığa çevrilə bilər. Daşnak nümayəndəsi "ölkənin işıqlı gələcəyini" qorumaq üçün "NET" (YOX) cəbhəsinin yaradılmasına çağırış edib.
Musavat.com qeyd edir ki, bu cür çıxışlar, əslində, Ermənistanda Paşinyanın Azərbaycan və Türkiyə ilə normallaşma siyasətinə qarşı olan qüvvələrin növbəti qara yaxmalarıdır. 8 avqustda Vaşinqtonda keçirilən görüşdən sonra Paşinyan Türkiyə ilə yaxınlaşma, sərhədlərin açılması və Azərbaycanla sülh müqaviləsi istiqamətində ardıcıl addımlar atmağa başlayıb. Məhz buna görə də, daşnak faşistləri və onların arxasında dayanan kilisə ilə Moskva dairələri Paşinyanın kursunu gözdən salmaq üçün hay-küy qaldırırlar.
