Abşeron Rayon Məhkəməsində əzab vermədə təqsirləndirilən Vahid Quliyevin (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, sonuncu keçirilən prosesdə hökm oxunub.
Məhkəmənin hökmü ilə o, 1 il müddətinə azadlıqdan məhrum edilib.
İttihama görə, Vahid Quliyev 2023-cü ilin müxtəlif vaxtlarında yaşadığı Abşeron rayonu, Xırdalan şəhərində yerləşən fərdi yaşayış evində həyat yoldaşı, zərərçəkmiş Səmayə Quliyevaya (adı, soyadı şərtidir) qarşı dəfələrlə zorakı hərəkətlər edib.
Belə ki, o, əvvəlcə ailə-məişət zəminində yaranmış mübahisə zamanı arvadının çənə nahiyəsinə yumruqla vuraraq ona dilin əzilmiş yarası və çənəaltı nahiyənin qançırı şəklində xəsarətlər yetirib.
2023-cü ilin avqust ayının əvvəlində isə yenidən mübahisə zəminində həyat yoldaşını hər iki bazu nahiyəsinə təpik zərbələri vurmaqla xəsarətləndirib.
Daha sonra - 16 avqust 2023-cü il tarixdə, saat 12 radələrində təqsirləndirilən şəxs evdə Səmayəni əl zərbələri ilə döyərək onun alt dodağının selikli qişasında səthi əzilmiş yaralar, sol gicgah-çənə oynağı və sol said nahiyələrində qançırlar törədib.
Nəhayət, 23 oktyabr 2023-cü il tarixdə, saat 23 radələrində tərəflər arasında yaranmış yeni mübahisə zamanı Vahid Quliyev arvadını şüşə butulka ilə baş nahiyəsindən vurub, nəticədə zərərçəkmişin başının alın nahiyəsində əzilmiş-cırılmış yara, eləcə də sağ əl üzərində sıyrıqlar əmələ gəlib.
Beləliklə, təqsirləndirilən şəxs həyat yoldaşını mütəmadi olaraq döyməklə, ona güclü fiziki ağrı yetirməklə və zorakı hərəkətlər etməklə əzab verib.
Kamal Məmmədov
