Rusiya məktəblərində təhsil almaq üçün müraciət edən miqrant uşaqlarının 87%-dən çoxu qeydiyyatdan keçə bilməyib.
APA-nın Moskva bürosu xəbər verir ki, bu barədə "Rosobrnadzor" məlumat yayıb.
Bildirilib ki, aprel-avqust aylarında xarici vətəndaşlığı olan 23 616 uşaq üçün sənəd təqdim edilib. Eyni zamanda, imtahana göndərilən cəmi 8223 uşaq üçün sənədlərin tam toplusu təqdim olunub.
5 940 uşaqdan 2964-ü sınaqdan uğurla keçib.
Qeyd edək ki, Rusiyada miqrant uşaqlarının orta məktəblərə qəbulu prosesi çətinləşdirilib. Əcnəbilərin uşaqlarının rus dili bilik səviyyəsi yoxlanılaraq məktəblərə qəbul edilir. Rusiyada bunu məktəblərdə yer çatışmazlığı ilə əlaqələndirirlər.
Bildirilir ki, ümumiyyətlə, əmək miqrantlarına ailələrini Rusiyaya gətirmək qadağan oluna bilər. Bu barədə qanun layihəsi artıq Dövlət Dumasına daxil olub. Layihəni “Ədalətli Rusiya - Həqiqət naminə” fraksiyasının rəhbəri Sergey Mironov və deputatlar Oleq Nilov, Yana Lantratova, Andrey Kuznetsov və Mixail Delyagin hazırlayıb.
Onlar Belarus vətəndaşları və yüksək ixtisaslı xarici mütəxəssislər üçün istisna edilməsini təklif edirlər.
Təşəbbüsün müəllifləri hesab edirlər ki, miqrant ailələr sosial infrastruktura (məktəblər, xəstəxanalar) həddindən artıq yük yaradırlar, bu yük patentlərdən (əmək fəaliyyəti ilə məşğul olmaq üçün rəsmi icazə-red) əldə edilən gəlirlə kompensasiya olunmur.
Deputatlar hesab edirlər ki, qanun layihəsi təsdiqlənərsə, Rusiya Federasiyasına miqrant axını 15-20% azala bilər.
