Bakı, 10 sentyabr, AZƏRTAC
On minlərlə etirazçının hökumət binalarına basqın etməsi, onları yandırması, siyasətçilərə hücumundan sonra Nepal əsgərləri çərşənbə günü, sentyabrın 10-da asayişi bərpa etməyə çalışaraq paytaxtı Katmandu küçələrində patrul xidməti aparırlar.
AZƏRTAC xəbər verir ki, Katmandu şəhərinin əsas ərazilərini mühafizə edən silahlı qüvvələr əvvəlki günlərdə zorakılıq və xaosa bürünmüş şəhərə müəyyən nəzarət atmosferi gətirir. Əsgərlər komendant saatı barədə sakinlərə məlumat verərək nəqliyyat vasitələrini və insanları yoxlayırlar.
Ordu çərşənbə axşamı günü axşam xəbərdarlıq edib ki, təhlükəsizlik qüvvələri asayişi qorumağa sadiqdir. Nepal ordusu nadir hallarda səfərbər olur və əvvəlcə kazarmada qalırdı, amma polis vəziyyətə nəzarət edə bilmirdi. Ordunun yaydığı bəyanatda 27 şübhəlinin qarətə görə həbs edildiyi bildirilib.
Çərşənbə axşamı günü səhər saatlarında etirazlar zorakılığa çevrilib, nümayişçilər hökumət binalarını və siyasətçilərin evlərini yandırıb və bəzi liderlərə hücum ediblər. Ölkənin siyasi elitasına qarşı artan tənqidlər fonunda Baş nazir istefa verib, baxmayaraq ki, bu, iğtişaşlara az təsir göstərib.
On minlərlə etirazçı küçələrdə qalıb, yolları bağlayıb və hökumət binalarına hücum edib. Ordu helikopterləri bəzi nazirləri təhlükəsiz yerə aparıb.
Sentyabrın 9-da daha çox nümayişçinin təhlükəsizlik qüvvələrinə hücumu nəticəsində polisin postlarını tərk etməsindən sonra Katmandu və digər şəhərlərdə 1500-ə yaxın məhbus həbsxanalardan qaçıb.
“Z nəslinin etirazı” adlandırılan nümayişlər hökumətin şirkətlərin qeydiyyatdan keçmədiyi və hökumətin nəzarəti altında olmadığını səbəb göstərərək “Facebook”, “X” və “YouTube” kimi sosial media platformalarını bloklamasından sonra başlayıb. Polis kütləyə atəş açıb, 22 nəfər həlak olub. Çərşənbə axşamı sosial media qadağası ləğv edilib, lakin qətllər və siyasi korrupsiya iddiaları ilə bağlı qəzəblə başlayan etirazlar davam edib.
Nepal Prezidenti Ram Çandra Paudel etirazçıları münaqişəni sülh yolu ilə həll etməyə və gərginliyin daha da artmasına son qoymağa çağırıb. O, Baş nazirin istefasını qəbul edib və ona yeni hökumət qurulana qədər müvəqqəti hökumətə rəhbərlik etməyi tapşırıb, baxmayaraq ki, hökumətin başçısı Olinin mövqeyi və harada olduğu məlum deyil. Gənclərin əksəriyyətinin iş tapmaqda çətinlik çəkir və onlar bir çox həmyaşıdı - siyasi liderlərin övladlarının, yəni “nepo uşaqları”nın dəbdəbəli həyat sürməsindən və çoxsaylı imtiyazlardan istifadə etməsindən narazıdırlar. Dünya Bankının məlumatına görə, Nepalda gənclər arasında işsizlik səviyyəsi keçən il təxminən 20% təşkil edib və hökumətin hesablamalarına görə, hər gün 2000-dən çox gənc Yaxın Şərq və ya Cənub-Şərqi Asiyada iş tapmaq üçün ölkəni tərk edir.
