Nyu-Yorkda keçirilən "US Open" tennis turnirində finalçılar müəyyənləşib.
Hafta.az xəbər verir ki, qadınların turnirində ilk yarımfinal oyununda Arina Sabalenka ilə Cessika Pequla qarşılaşıb.
İlk set ABŞ-li tennisçinin xeyrinə başa çatıb - 6:4. Lakin sonrakı iki setdə belaruslu Sabalenka üstün olaraq finala adlayıb - 6:3, 6:4.
Digər yarımfinal qarşılaşması daha gərgin alınıb. İlk iki set tay-breyklə yekunlaşıb. Birincisində yapon tennisçi Naomi Osaka üstün olub. İkinci tay-breykdə qalib gələn Amanda Anisimova tarazlığı bərpa edib. Həlledici seti də ABŞ-li tennisçi qazanaraq finala yüksəlib - 6:3.
Beləliklə, şənbə günü baş tutacaq final matçında Arina Sabalenka Amanda Anisimova ilə mübarizədə keçənilki titulunu qorumağa çalışacaq.
Qeyd edək ki, kişilərin turnirində finalçıların adlarına bu gecə aydınlıq gələcək.
