Sabunçu Rayon Məhkəməsində qəsdən sağlamlığa az ağır zərər vurmada təqsirləndirilən Samir Hacıyevin (soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Teymur Həsənovun sədrliyi ilə keçirilən prosesdə hökm oxunub.
Məhkəmənin hökmü ilə o, 1 il müddətinə azadlığın məhdudlaşdırılması (elektron qolbaq) cəzasına məhkum edilib.
İttihama görə, hadisə 13 iyul 2025-ci il tarixdə, saat 21:40 radələrində Bakı şəhəri, Sabunçu rayonu, Zabrat qəsəbəsində yerləşən “OBA Market”in arxa hissəsində qeydə alınıb.
Belə ki, Samir Hacıyev qeyri-rəsmi münasibətdə olduğu (sevgilisi) zərərçəkmiş Cahan Məlikzadə (soyadı şərtidir) ilə küçədə ailə-məişət münaqişəsi zəminində mübahisə edib. Sonra o, qadını marketin arxa hissəsinə aparıb, qəsdən əli ilə baş və üz nahiyəsinə bir neçə dəfə vuraraq, ona xəsarət yetirib.
Hadisədən sonra Samir Hacıyev saxlanılaraq cinayət məsuliyyətinə cəlb edilib.
Kamal Məmmədov
