“Roqun Su Elektrik Stansiyasının tikintisi və tam işə salınması ilə biz Tacikistanın bu günü və sabahının firavanlığını, indiki və gələcək nəsillər üçün xoşbəxt həyatı təmin edəcəyik”.
Hafta.az-ın yazdığına görə, bunu Tacikistan prezidenti Emoməli Rəhmon bu gün Roqun Su Elektrik Stansiyasını ziyarəti sırasında işçilərlə görüşündə deyib.
Prezident Rəhmon deyib ki, Roqun Su Elektrik Stansiyasının ilk iki bloku istismara veriləndən indiyədək 9,1 milyard kilovat-saat elektrik enerjisi istehsal edib. Onun da maddi dəyəri 2,1 milyard somonidir.
Bildirilib ki, 2026-cı ildə beşinci və altıncı bloklarda görülən işlərlə elektrik enerjisi istehsalının həcmi daha da artacaq.
Tikinti prosesinin təhlili zamanı vurğulanıb ki, su elektrik stansiyasının tikinti işlərinin sürət və keyfiyyətlə aparılması, o cümlədən bəndin inşasını yüksək səviyyədə və beynəlxalq standartlara uyğun sürətləndirmək, stansiyanın növbəti güclərinin müəyyən edilmiş müddətdə istifadəyə verilməsi zəruridir.
Vurğulanıb ki, 2025-ci ilin əvvəlindən büdcə vəsaiti hesabına görülən işlərə 4,3 milyard somoni xərclənib. Ümumiyyətlə, 2008-ci ildən indiyədək hökumət tərəfindən su elektrik stansiyasının tikintisinin başa çatdırılması üçün dövlət büdcəsi və digər mənbələr hesabına 48,1 milyard somonidən çox vəsait ayrılıb. Hazırda stansiya obyektlərində 18,3 min fəhlə və mühəndis-texniki işçi çalışır, maşın və mexanizmlərin sayı 3721-ə çatdırılıb. O cümlədən, 2024-2025-ci illər ərzində işlərin sürətləndirilməsi üçün tikinti sahəsinə 443 yeni maşın və mexanizm gətirilib.
Dövlət başçısı Roqun SES-in sifarişçi və podratçılarını işlərin genişləndirməyə və nəzərdə tutulan tikinti planını vaxtında yerinə yetirməyə çağırıb.
“Vibild” şirkətinə bu il sentyabrın sonunadək bəndin səviyyəsinin müəyyən edilmiş hündürlüyə qaldırılmasını və su anbarının 1100 metr həddinə qədər doldurulmasını təmin etmək tapşırılıb.
“Vibild” şirkətinə əlverişli hava şəraitindən istifadə edərək gecə-gündüz işin təşkili, maşın və mexanizmlərin sayını artırmaq, bəndin tikintisi üçün lazımi material ehtiyatı ilə təmin etmək və konveyer xəttindən səmərəli istifadə üçün əməli tədbirlər görmək tapşırılıb.
“Tacikhidroelektromontaj” şirkətinə dördüncü dərəcəli tikinti tunelinin daşqın mövsümünə qədər, yəni 2026-cı ilin aprelindən gec olmayaraq tam gücü ilə istismara hazır olmasını təmin etmək tapşırığı verilib.
