Boliviyada keçirilən prezident seçkilərinin birinci turunda heç bir namizəd kifayət qədər səs toplaya bilməyib.
Rəsmi olmayan nəticələrə görə, mərkəz sağın namizədi senator Rodrigo Paz səslərin 31 faizini toplayaraq seçki yarışına liderlik edib.
Sabiq prezident sağçı Xorxe Kiroqa səslərin 27 faizini, müxalif iş adamı Samuel Doria Medina isə 20,2 faizini toplayaraq üçüncü yeri tutub.
Son 20 ildir hakimiyyətdə olan Sosializmə Doğru Hərəkat (MAS) partiyasının namizədi, sabiq daxili işlər naziri Eduardo del Kastillo cəmi 3,2 faiz səs topladığına görə ikinci turda iştirak edə bilməyəcək.
1989–1993-cü illər arasında Boliviyaya rəhbərlik etmiş sabiq prezident Xayme Paz Zamoranın oğlu olan 57 yaşlı Rodrigo Paz ilk turun qalibi kimi milli mediada ikinci turun əsas favoriti hesab olunur.
Ali Seçki Məhkəməsindən (TSE) rəsmi nəticələr açıqlandıqdan sonra seçkilərin ikinci turunun 19 oktyabrda keçiriləcəyi rəsmiləşəcək.
MAS ilə fikir ayrılığına görə istefa verən və seçkilərdə iştirakı yüksək məhkəmə tərəfindən rədd edilən keçmiş prezident Evo Morales tərəfdarlarını etibarsız səslər verməyə çağırıb.
