BAKI, 16 avqust. TELEQRAF
ABŞ və Çin birlikdə qlobal şəxsi sərvətin 54%-nə sahibdir. ABŞ-nin payı 34,7% (150,9 trilyon avro), Çinin payı isə 19,4% (84,2 trilyon avro) təşkil edir.
Teleqraf xəbər verir ki, bu barədə İsveçrədə yerləşən qlobal investisiya bankı və maliyyə xidmətləri şirkəti UBS-in 2025 Qlobal Sərvət Hesabatında qeyd edilib.
Hesabata görə, üçüncü yerdə 4,5%-lə (19,7 trilyon avro) Yaponiya qərarlaşıb. Avropa (Aİ, Böyük Britaniya, İsveçrə, Norveç və Türkiyə daxil olmaqla) qlobal sərvətin 22,3%-nə malikdir. 2024-cü ilin sonunda qlobal şəxsi sərvəti 471 trilyon dollar (435 trilyon avro) olub.
Avropada qlobal şəxsi sərvətdə ən yüksək paya 3,84% ilə Böyük Britaniya sahibdir. Almaniya (3,76%) ikinci, Fransa (3,3%) isə üçüncü yerdədir. İtaliya (2,25%) və İspaniya (1,95%) ilk beşliyi tamamlayır. Bu beş ölkənin ümumi payı (15,1%) Çinin payından (19,4%) xeyli azdır.
Niderland (1,14%) və İsveçrə (1,04%) 1%-dən yuxarı paya malikdir. Qalan Avropa ölkələrinin payı bu həddən xeyli aşağıdır, 31 ölkədən 19-da göstərici 0,4%-dən azdır. Lüksemburq, Bolqarıstan, Slovakiya, Sloveniya, Litva, Latviya, Kipr, Estoniya və Maltada isə bu rəqəm 0,1%-dən aşağıdır.
Nominal ifadədə Böyük Britaniyanın şəxsi sərvəti 16,7 trilyon avro təşkil edir. Almaniya 16,4 trilyon avro ilə ikinci, Fransa isə 14,3 trilyon avro ilə üçüncü yerdədir. Avropada başqa heç bir ölkənin şəxsi sərvəti 10 trilyon avro həddini aşmır.
Qeyd edək ki, bu rəqəmlər ümumi sərvəti və milli payı göstərir, lakin fərdi səviyyədə hansı ölkələrin daha varlı olduğunu əks etdirmir. Fərqli ölkələrdəki fərdlərin varlılıq səviyyəsini müqayisə etmək üçün yetkin başına sərvət göstəricisi istifadə olunur.
Ümumiyyətlə, ÜDM-i yüksək olan ölkələr, ilk beş Avropa iqtisadiyyatında olduğu kimi, qlobal şəxsi sərvətdə daha böyük paya malik olur. Hesabatda ABŞ və Çinin qlobal sərvətin yarıdan çoxuna sahib olması isə belə izah edilir: “Yüksək yetkin başına sərvət və böyük əhali sayı ABŞ-yə qlobal sərvətin təxminən 35%-nə sahib olmağa imkan verir. Çin isə böyük əhalisi sayəsində şəxsi sərvətin təxminən 20%-nə sahibdir.”
Şərqi Avropada şəxsi sərvət artıb, Qərbdə azalıb
Qlobal şəxsi sərvət 2024-cü ildə dollar ifadəsində 4,6% artaraq əvvəlki ilin (4,2%) göstəricisini üstələyib. Lakin artım bölgələr üzrə bərabər olmayıb.
Şərqi Avropa 2024-cü ildə 2023-cü illə müqayisədə 12%-dən çox artımla lider olub və 28 min yeni milyonçu qazanaraq (2,9% artım) əsas inkişaf “mühərriki”nə çevrilib. “Böyük Çin”də (Çin Xalq Respublikası, Honq Konq, Makao və Tayvanı əhatə edir) şəxsi sərvət 3,4% artaraq Cənub-Şərqi Asiyanın (2,7%) göstəricisini keçib. Yaxın Şərq və Afrika 4,2% artım nümayiş etdirərək müsbət dinamika göstərən yeganə digər region olub. Qərbi Avropa və Okeaniya (-1,5%) ilə Latın Amerikasında (-4,3%) isə azalmalara qeydə alınıb.
