2025-ci ilin pensiya ödənişlərinin artımı
Dövlət Sosial Müdafiə Fondunun məlumatına görə, 2025-ci ilin yanvar-iyul aylarında pensiya ödənişlərinə 4 milyard 142 milyon manat xərclənib. Bu, ötən ilin eyni dövrü ilə müqayisədə 10 faiz çox vəsait deməkdir ki, bu da 367 milyon manat artım anlamına gəlir.
Finss.az-ın məlumatına görə, Milli Məclisin İqtisadi siyasət, sənaye və sahibkarlıq komitəsinin üzvü Vüqar Bayramov sosial şəbəkə hesabında bildirib ki, pensiya ödənişlərindəki artım əsasən 2025-ci ildə 5-ci sosial paketin tətbiqi ilə bağlıdır.
V.Bayramov qeyd edib ki, bu ilin əvvəlindən bütün növ əmək pensiyaları 8,1 faiz indeksləşdirilərək artırılıb. 1 fevral 2025-dən minimum pensiya 14,3 faiz artımla 320 manata çatdırılıb.
Bu tədbirlər 1,1 milyon vətəndaşı əhatə edib və pensiya xərclərinin artmasına birbaşa təsir göstərib.
Fuad Mədətov
Finss.az
