Bu skuterin sürəti 160 km/saat olacaq

Keçmiş “Williams” “Formula 1” mühəndisi tərəfindən qurulan Britaniyanın “Bo” şirkəti özünün flaqman məhsulu olan ultra dəbli alüminium “Model-M” elektrik skuteri ilə rekord vurmağa hazırlaşır.
Tribunainfo.az xəbər verir ki, adi versiyada skuter 400 vattlıq mühərriki ilə 40 kilometrə qədər məsafəni 25 km/saat sürətlə hərəkət edə bilir.
Bununla belə, skuterin digər versiyası təkmilləşdirilmiş parametrlərə malik xrom modifikasiyası ilə 60 km məsafə və 35 km/saat sürət əldə etməyə imkan verir. Bu isə onu gündəlik nəqliyyat vasitəsindən daha çox lüks əşyaya çevirir.
Buna baxmayaraq, şirkətin mühəndisləri bu yaxınlarda skuter üçün 160 km/saat fantastik sürət əldə etməyə imkan verən “Turbo” adlı modeli təqdim ediblər.
Yeni versiyaya pik cərəyanı 300 A olan iki motor təkəri, 20,4 Ah tutumlu 88 voltluq akkumulyator və hava kanalları olan soyutma sistemi daxildir.
İngiltərədəki Qudvud avtdromundakı sınaqlar zamanı prototip 135 km/saat sürət göstərib. Lakin mühəndislər bununla kifyətlənmək niyyətində deyillər. Onlar Amerikanın Yuta ştatının məşhur düzənliklərində elektrik skuteri üçün 160 km/saatlıq rəsmi sürət rekordu vurmağı planlaşdırırlar.
Qeyd edək ki, 1949-cu ildən burada hər il “Sürət Həftəsi” keçirilir. Reqlamentə əsasən, rekordun rəsmi tanınması üçün 60 dəqiqə ərzində ən azı 2 gediş-dönüş hərəkəti yerinə yetirilir. Bundan sonra orta sürət hesablanır. Bu yanaşma külək və yol xüsusiyyətlərinin təsirini istisna edir.
Xatırladaq ki, “Bo”nun yeni “sürət rekordçusu”nun qiyməti 30 min dollardır.