Şəkərsiz çay içmək bütün səbəblərdən, həmçinin xərçəng və ürək-damar xəstəliklərindən ölüm riskinin əhəmiyyətli dərəcədə azalması ilə əlaqələndirilir. Ancaq şəkərli və ya dadlandırıcılı çayın belə bir təsiri yoxdur.
Publika.az xəbər verir ki, bu barədə “Frontiers in Nutrition” jurnalında dərc olunan araşdırmada qeyd olunub.
Tədqiqatda 37-73 yaş arası 195 361 könüllü iştirak edib. Natamam sağlamlıq məlumatları olan insanlar, hamilə qadınlar və enerji qəbulu normadan əhəmiyyətli dərəcədə kənara çıxanlar analizdən çıxarılıb.
Müəlliflər üç növ çayın – şəkərsiz, şəkərlə və süni dadlandırıcılı çayların ümumi və spesifik ölüm göstəricilərinə təsirini müqayisə ediblər. Əsas diqqət tədqiqat iştirakçıları tərəfindən ən çox istehlak edilən qara çaya yönəldilib.
Məlum olub ki, gündə 3,5 - 4,5 stəkan çay içənlərin bütün səbəblərdən ölüm riski 20%, ürək-damar xəstəliklərindən ölüm riski 27%, xərçəngdən ölüm riski isə 14% azalıb. Bu təsir kofein mübadiləsinin genetik xüsusiyyətlərindən asılı olmayıb. Eyni zamanda, şəkər və ya dadlandırıcılar olan bir içki qoruyucu təsir göstərməyib.
