BAKI, TurkicWorld
Ukrayna ilə danışıqlarda memorandum layihələri müzakirə olunacaq.
TurkicWorld xəbər verir ki, Kremlin sözçüsü Dmitri Peskov Rusiya ilə Ukrayna arasında bu həftə keçirilməsi planlaşdırılan üçüncü raund danışıqlarda memorandum layihələrinin gündəmdə olacağını bildirib.
Moskva mətbuatına açıqlama verən Peskov qeyd edib ki, tərəflər bir-birinə sülh sazişi üzrə müxtəlif memorandum layihələri təqdim ediblər. “Bu sənədlər bir-birindən fərqlidir və ciddi diplomatik səylər tələb edir”- deyə o bildirib.
O əlavə edib ki, danışıqların dəqiq tarixi hələ müəyyənləşməyib və razılaşma əldə olunduqda ictimaiyyətə açıqlanacaq. Peskov, həmçinin Rusiya nümayəndə heyətində heç bir dəyişikliyin olmadığını vurğulayıb.
Qeyd edək ki, Rusiya ilə Ukrayna arasında davam edən sülh danışıqları beynəlxalq ictimaiyyətin diqqətində qalmaqda davam edir. Üçüncü raundun baş tutacağı təqdirdə, memorandum layihələri danışıqların əsas mövzularından biri olacaq.
