Azərbaycanın işğaldan azad edilmiş Qarabağ bölgəsi sürətlə dirçəlir. Ermənistanın vandalizm əməllərinin, törətdiyi geniş miqyaslı dağıntıların nəticələri aradan qaldırılır. Hazırda azad Qarabağda möhtəşəm quruculuq işləri həyata keçirilir. Artıq Qarabağ da mötəbər beynəlxalq tədbirlərin keçirildiyi məkana çevrilib.
Publika.az xəbər verir ki, bu fikirləri Milli Məclisin deputatı Samir Vəliyev deyib.
Deputat bildirib ki, artıq Qarabağın incisi olan Şuşa şəhərində keçirilən beynəlxalq tədbirlərin sayı hesabı yoxdur. Belə tədbirlərdən biri də ənənə halını almış Şuşa Qlobal Media Forumudur. Ötən iki ildə bu forumlar Şuşa şəhərində keçirilib. Amma 3-cü Qlobal Şuşa Media Forumu Xankəndi şəhərində keçirilməsi ilə əlamətdar oldu. Məlumdur ki, 3-4 iyul tarixlərində Xankəndi şəhərində İqtisadi Əməkdaşlıq Təşkilatının 17-ci sammiti keçirilmişdi. Bunun ardınca - iyulun 19-da III Şuşa Qlobal Media Forumunun keçirilməsi də Xankəndinin möhtəşəm dirçəlişinin parlaq ifadəsidir.
Millət vəkilinin sözlərinə görə, Prezident İlham Əliyev Forumda iştirak edərək iştirakçıların çoxsaylı suallarını cavablandırıb. Forumun mövzusu isə qlobal miqyasda çox aktual olan məsələyə həsr olunub. "Rəqəmsal keçidlər: Süni intellekt dövründə informasiya və media dayanıqlılığının gücləndirilməsi” mövzusunda keçirilən III Şuşa Qlobal Media Forumunda dövlətimizin başçısı regional, o cümlədən qlobal miqyasda baş verən proseslərə toxunub, ölkəmizin enerji siyasətinin perspektivləri və digər məsələlərlə bağlı fikirlərini ifadə edib. Cənubi Qafqazda sülh imkanlarından danışan Dövlətimizin başçısı Əbu-Dabi görüşünü müsbət dəyərləndirib. Bununla belə, erməni tərəfinə Azərbaycanın şərtlərini xatırladıb. Zəngəzur dəhlizinə gəlincə, cənab Prezident bir daha Azərbaycanın prinsipial mövqeyini xatırladıb. Bu da ondan ibarətdir ki, Naxçıvanla maneəsiz və təhlükəsiz gediş-gəliş təmin olunmalıdır. Dövlətimizin başçısı azad edilmiş ərazilərdə bərpa işləri, böyük qayıdış, 150 illik yubileyini qeyd edən milli mətbuatımızın qarşısında duran vəzifələr və s. haqqında da fikirlərini bildirib.
