"Rusiya müharibəni dinc əhaliyə qarşı yönəltməkdə davam edir, Ukraynanın HHM qüvvələri mümkün qədər itkilərin qarşısını almağa çalışır..."
İyulun 18-ə keçən gecə Rusiya ordusu Ukraynanın bir neçə vilayətinə genişmiqyaslı hücum həyata keçirib.
Moderator.az xəbər verir ki, bu barədə "24tv.ua" nəşri məlumat yayıb.
Məlumatda deyilir ki, "Shahed" dronları, kamikadze aparatları və idarə olunan aviazərbələr (KAБ-lar) vasitəsilə edilən hücumlar nəticəsində dinc insanlar həyatını itirib, bir çoxu yaralanıb, mülki infrastruktur isə zədələnib.
Dnepropetrovsk vilayətində dağıntı və ölüm
Gecə saatlarında Rusiya ordusu Dnepropetrovsk vilayətinin Pavloqrad və Kamensk rayonlarına pilotsuz uçuş aparatları ilə hücum edib. Pavloqrad rayonundakı nəqliyyat müəssisəsinə edilən zərbə nəticəsində 52 yaşlı maşinist həyatını itirib, onun köməkçisi isə yaralanıb. Həmçinin iki mülki şəxs - 38 və 40 yaşlı kişilər xəsarət alıb. Kamensk rayonunda isə daha faciəli nəticələr qeydə alınıb - dron zərbəsi nəticəsində bir kişi və qadın həlak olub. Hücum nəticəsində yanğın baş verib, inzibati binalar, mağaza və fərdi yaşayış evləri zədələnib.
Zaporojyedə KAБ zərbəsi
Zaporojye vilayətinin Stepnoqorsk icmasında ağır idarəolunan aviazərbə nəticəsində 64 yaşlı bir kişi həyatını itirib. Vilayət rəhbəri İvan Fyodorovun sözlərinə görə, bomba yaşayış massivinə düşüb, nəticədə bir neçə çoxmərtəbəli binada yanğın başlayıb.
Xarkovda yaralılar, Donetskdə könüllülərə hücum
Xarkov vilayətinin Çuquyev şəhərində səhərə yaxın edilən zərbə nəticəsində dörd nəfər yaralanıb. Hücum şəhərin yaşayış məhəlləsinə yönəlib. Nəticədə yaşayış evləri, ailə həkiminin sahəsi və bir təhsil müəssisəsi zədələnib. Donetsk vilayətinin Rodinsk şəhərində isə daha bir cinayətkar hücum qeydə alınıb. Burada könüllülərin avtomobili kamikadze-dronla vurulub. 42 yaşlı sürücü, 77 yaşlı kişi və 67 yaşlı qadın xəsarət alıb - onların hər üçündə qəlpə və kəllə-beyin travmaları aşkarlanıb.
Ümumrespublika miqyasında dron hədəfləri və hava hücumundan müdafiə
Ukrayna Silahlı Qüvvələrinin Hava Qüvvələrinin məlumatına görə, iyulun 17-də saat 21:30-dan iyulun 18-də səhərə qədər Rusiya ümumilikdə 35 dron - əsasən "Shahed" tipli kamikadze dronları və imitasiyalı aparatlarla hücum həyata keçirib. Hücumlar əsasən şərq vilayətlərini - cəbhəyanı əraziləri hədəfə alıb. Dronlar Rusiyanın Millerovo və Primorsko-Axtarsk bölgələrindən buraxılıb.
Ukrayna hava hücumundan müdafiə sistemləri bu gecə 11 "Shahed" dronunu vurub. Eyni zamanda 6 imitasiya dronu radioelektron mübarizə vasitəsilə sıradan çıxarılıb. Ümumilikdə 5 fərqli ərazidə 18 dron hədəfə dəyib, daha 2 zonada isə vurulan dronların qalıqları düşüb.
Kiyevdə "sakitlik" - təsadüf, yoxsa siyasi jest?
Son günlər Kiyevə hücumlar qeydə alınmayıb. Ukrayna ictimaiyyətində və bəzi ekspertlər arasında belə fikir var ki, bu, ABŞ-ın keçmiş generalı və Trampın xüsusi nümayəndəsi Kit Kelloqun Kiyevdə olduğu müddətdə Putinin göstərişi ilə baş verib. Amma hərbi ekspert Aleksandr Kovalenko bu versiyanı şübhə altına alır və baş verənləri təsadüf adlandırır.
İyulun 18-ə keçən gecə Ukrayna yenə də dəhşətli bir hücuma məruz qalıb. Müxtəlif vilayətlərdə edilən dron və bomba zərbələri insan tələfatına, yaralanmalara və infrastruktur itkilərinə səbəb olub. Rusiya müharibəni dinc əhaliyə qarşı yönəltməkdə davam edir. Amma Ukraynanın hava hücumundan müdafiə qüvvələri mümkün qədər itkilərin qarşısını almağa çalışır. Bu gecə də dəhşət və faciə ilə yadda qalıb.
