Sumqayıt Apellyasiya Məhkəməsində xuliqanlıqda təqsirləndirilən İqbal Tahirzadənin (adı, soyadı şərtidir) barəsindəki hökmdən verilən apellyasiya şikayəti üzrə məhkəmə iclası yekunlaşıb.
Pravda.az-ın əldə etdiyi məlumata görə, sonuncu keçirilən prosesdə qərar elan olunub.
Qərara əsasən, apellyasiya şikayəti təmin edilməyib.
İttihama görə, hadisə 23 avqust 2024-cü il tarixdə, saat 08 radələrində Şamaxı rayonu, Sabir qəsəbəsi Məhəmməd Hadi küçəsində qeydə alınıb.
Belə ki, İqbal Tahirzadə yaşadığı sözügedən ərazidə piyada hərəkətdə olan zaman zərərçəkmiş Pənah Bayramovun (adı, soyadı şərtidir) ona yaxınlaşaraq Sabir qəsəbəsində yaşayan traktor sürücüsünün ünvanını soruşub. Bu zaman o, “səni çoxdan axtarırdım” deyərək zərərçəkmiş şəxsi nalayiq ifadələrlə təhqir edib, üzərinə doğru gəlib. Pənah isə İqbalın işlətdiyi nalayiq ifadələrə görə ona iradını bildirib. Sonra İqbal zərərçəkmişin arvadı onun bacısı ilə əvvəllər mübahisə etməsini və bu səbəbdən də Pənahı axtarmasını bəhanə edib. O, zərərçəkmişi anidən yerə yıxaraq yumruq və təpiklə bədəninin müxtəlif nahiyələrindən ardıcıl zərbələr vurub. Daha sonra Pənah ayağa qalxaraq avtomobili istiqamətinə gedərkən İqbal daş parçası ilə onun başının arxa hissəsindən vuraraq, ona xəsarətlər yetirib.
Hadisədən sonra İqbal Tahirzadə saxlanılıb və barəsində həbs qətimkan tədbiri seçilib.
Şamaxı Rayon Məhkəməsinin hökmü ilə o, 3 il müddətinə azadlıqdan məhrum edilib.
Qeyd: İqbal Tahirzadə “Azpetrol” yanacaq doldurma məntəqəsində kassir-operator vəzifəsində işləyib.
Kamal Məmmədov
