Rusiya hökuməti, ABŞ-ın nüfuzlu ali təhsil ocaqlarından biri olan Yale Universitetini "arzuedilməz təşkilat" elan edib. Rəsmi qərara əsasən, universitetin Rusiyada hər hansı fəaliyyətinə – o cümlədən akademik əməkdaşlığa, mübadilə proqramlarına və araşdırma layihələrinə – tamamilə qadağa qoyulub.
AzEdu.az-ın xarici mediadan əldə etdiyi məlumata görə, bu addım Kremlin “xarici təsirlərə qarşı mübarizə” siyasəti çərçivəsində atılıb və Qərb təhsil institutlarına qarşı artan təzyiqlərin bir hissəsi kimi qiymətləndirilir.
Rusiyanın Ədliyyə Nazirliyi bildirib ki, Yale Universitetinin fəaliyyəti ölkə üçün “təhlükə yaradır” və gənclərə “zərərli ideoloji təsir” göstərə bilər. Lakin konkret əsaslandırma təqdim edilməyib.
Mütəxəssislər bu qərarın Rusiya ilə Qərb ölkələri, xüsusən də ABŞ universitetləri arasında akademik əlaqələrə ciddi zərbə vurduğunu qeyd edirlər. Yale Universiteti isə hələlik məsələ ilə bağlı rəsmi açıqlama verməyib.
