"Sizin Lombard" brendi ilə kredit bazarında təmsil olunan "GL" ASC 2024-cü ili 3 milyon 35 min manat xalis mənfəət ilə başa vurub. Halbuki, kredit şirkəti 2023-cü ili 2 milyon 876 min manat xalis mənfəət ilə bağlamışdı. Beləliklə, "GL" ASC-nin 2024-cü ildə xalis mənfəəti 2023-cü illə müqayisədə 159 min manat və ya 5,5% artıb. Xalis mənfəətin artması faiz gəlirlərinin artmasından və ehtiyata ayırmanın azalmasından qaynaqlanıb.
Marja.az şirkətin 2024-cü il üzrə maliyyə hesabatlarına istinadən xəbər verir ki, "GL" ASC-nin faiz gəlirləri 2023-cü ildə 16 milyon 298 min manat ikən, 2024-cü ildə 19 milyon 486 min manata yüksəlib (3 milyon 188 min manat və ya 19,6% artıb ) Şirkət ötən il 202 min manat haqq və komissiya gəlirləri əldə edib (2023-cü ildə 305 min manat).
KREDİT PORTFELİ BÖYÜYÜB
"GL" ASC-nin kredit portfeli (müştərilərə verilmiş kredirlər) 2024-cü ildə 2023-cü illə müqayisədə 6 milyon 748 min manat və ya 17% artaraq 31 dekabr 2024-cü il tarixində 46 milyon 272 min manata çatıb. 2023-cü ilin sonunda Şirkətin kredit portfeli 39 milyon 524 min manat təşkil etmişdi.
"GL" ASC 2024-cü ilin yekununda 52 milyon 924 min manat cəmi aktivlərə malik olub (2023-cü ilin sonunda 46 milyon 673 min manat).
31 dekabr 2024-cü il tarixində "GL" ASC-nin 475 nəfər işçisi olub.
Qeyd edək ki, "GL" ASC-nin nizamnamə kapitalının 100%-i Quliyev Fərman Eldar oğluna məxsus olub.
