Pravda.az saytına istinadən ain.az xəbər verir.
“Rusiyanın Yekaterinburq şəhərində azərbaycanlılara qarşı keçirilmiş reydlər mahiyyəti etibarilə cinayət tərkiblidir, Rusiya və Azərbaycanın strateji müttəfiqlik münasibətlərinin xarakterinə daban-dabana ziddir. Bu, ikitərəfli münasibətlərimizdə son günlər çox ciddi siyasi, diplomatik böhrana səbəb olub. Azəraycan dövləti, ictimaiyyəti bu məsələ ilə bağlı haqlı ədalətli səsini qaldırıb. Azərbaycan cəmiyyətinin etirazı bəllidir. İctimaiyyətin narahatlığı açıq şəkildə ifadə olunub. Azərbaycanın müvafiq dövlət qurumları da etirazlarını ifadə edib, konkret addımlara imza atıblar. Münasibətlərdə gərginlik hələ də qorunub-saxlanmaqdadır. Rusiyanın Xarici İşlər Nazirliyinin sözçüsü Mariya Zaxarova müsahibəsində qeyd etdi ki, Azərbaycan və Rusiya arasında ənənəvi dostluq münasibətləri var. Hətta bəzən üçüncü tərəflər yaranmış reallıqdan öz mənafeləri üçün istifadə etmək istəyirlər, biz Azərbaycanla dostluq münasibətlərinin qorunub-saxlanılmasında maraqlıyıq. Çox gözəl, bəs dostluq münasibətlərinə xələl gətirən addımları kim atıb? Rusiya. Vəziyyətin tragikomikliyi bundadır ki, hadisəni ayrı-ayrı cinayətkar elementlər, ünsürlər, kriminal aləmin təmsilçiləri deyil, kriminogen aləmlə, cinayətkarlarla mübarizə aparmalı olan orqanların özləri ediblər”.
Bu sözləri Pravda.az-a açıqlamasında Milli Məclisin deputatı Elman Nəsirov deyib.
Deputat bildirib ki, Yekaterinburqda törədilən cinayəti Rusiyanın Federal Təhlükəsizlik Xidməti, OMON, polis birlikdə həyata keçiriblər: “Polisin funksiyası öz vətəndaşının təhlükəsizliyini təmin etməkdir. Biz isə əksini görürük, vətəndaşların təhlükəsizliyi üçün problemlər yaradan bir quruma çevrilib. Həm də Rusiya tərəfdən cəfəng iddialarla çıxış etməyə başlayıblar ki, qətlə yetirilən azərbaycanlı və digər saxlanılan şəxslər Rusiya vətəndaşlarıdırlar, bu, Rusiyanın daxili işidir. Xeyr, belə bir şey yoxdur. Gəlin yerlərimizi dəyişək. Analoji hadisə Azərbaycanda baş versəydi, rus əsilli Azərbaycan vətəndaşlarına qarşı analoji cinayət törədilsəydi, rəsmi Moskva deyəcəkdi ki, Bakının daxili işidir? Belə yanaşacaqdınız? Gəlin, riyakar olmayaq, hər şeyi öz adı ilə söyləyək. Ən qorxulu cəhət budur ki, hazırda Rusiyanın dövlət qurumlarının leksikonuna “etnocinayətkarlıq” ifadəsi düşüb. Heç cinayətkarlığın da “etno”su olur? Heç onun dini, milləti, irqi olur? Cinayətkar hər yerdə cinayətkardır. Onlarla koordinasiyalı mübarizə olmalıdır. Belə çıxır ki, eyni cinayəti Rusiya işləsə yaxşıdır, qeyri-rus etsə, pisdir? “Etnocinyaətkarlıq” kimi cəfəng terminologiyanın mahiyyəti bundan ibarətdir. Azərbaycanın müvafiq dövlət qurumları çox prinsipial və qətiyyətli mövqe ortaya qoyublar. Hiss olunur ki, bu mövqe qarşısında Rusiya tərəfdə müəyyən mənada yumşalma elementləri görülməkdədir. İstəyirik ki, Rusiya tərəfi 2024-cü ilin 25 dekabrında mülki təyyarəmizin vurulması ilə bağlı açdığı cinayət işi sona yetirilsin, cinayətkarlar cəzalandırılsın, azərbaycanlı deputatın deportasiyasını təşkil edənlər müvafiq məsuliyyətə cəlb edilsin, Azərbaycana qarşı kiberhücumlar təşkil etmiş şəxslər tapılsın və cəzalansın. Həmçinin Yekaterinburqda baş vermiş müdhiş cinayət əməli ilə bağlı konkret şəxslər, “poqonlu” cinayətkarlar cəzalandırılsın. Bundan sonra ikitərəfli münasibətlərin yumşaldılması istiqamətində addımlar atıla, Azərbaycan dövləti, cəmiyyəti, ictimaiyyəti də razı qala bilər. Hər şey Rusiyadan asılıdır. Top Rusiya tərəfdədir”.
Aytəkin Qardaşova
Hadisənin gedişatını izləmək üçün ain.az saytında ən son yeniliklərə baxın.
