NATO-nun Avropadakı müttəfiqləri qitədəki ABŞ qoşunlarının sayının azaldılması halında Alyansın necə hərəkət etməli olduğu barədə qeyri-rəsmi hazırlıqlara başlayıblar.
Musavat.com xarici agentliklərə istinadən xəbər verir ki, bu barədə Euractiv saytı məlumat yayıb.
Avropadakı NATO müttəfiqləri əmindirlər ki, ABŞ prezidenti Donald Tramp Avropada yerləşdirilmiş – hazırda təxminən 80 min nəfərlik – hərbi kontingentin sayını azaldacaq və bu qüvvələri Asiyaya və Yaxın Şərqə yönləndirəcək. Bu səbəbdən NATO-nun hərbi planlaşdırıcıları üç əsas məsələni müzakirə edirlər: ABŞ ordusundan nə qədər qüvvə çıxarılacaq, bu çıxarılma nə qədər qəfil və genişmiqyaslı olacaq və Avropa qüvvələri çıxarılan ABŞ hərbi gücünü əvəz edə biləcəkmi?
“Nəticə etibarilə məsələ, ABŞ qoşunlarının çıxarılıb-çıxarılmayacağı deyil, bunun Alyansın mövcud müdafiə planlarını təhlükəyə atmadan nə qədər koordinasiyalı şəkildə həyata keçirilə biləcəyidir,” – deyə NATO diplomatlarından biri bildirib.
Qeyd edək ki, NATO yalnız keçən il öz müdafiə planlarını yenidən nəzərdən keçirib. Bu planlar Alyansın istənilən potensial hücuma reaksiyasını müəyyən edir. Lakin bu strategiyalar böyük ölçüdə ABŞ-ın hərbi texnikasına, hava qüvvələrinə və on minlərlə amerikalı hərbçiyə əsaslanır.
NATO-nun şərq cinahında yerləşən üzv dövlətlər isə ABŞ qoşunlarının qəfil çıxarılması ehtimalından xüsusilə narahatdır. Bu ölkələrdən bəziləri NATO-ya qeyri-rəsmi şəkildə çağırış edərək, müdafiə planlarının yenidən nəzərdən keçirilməsi üzrə danışıqların sürətləndirilməsini istəyir və bu yolla ABŞ-ın rolunun əhəmiyyətli dərəcədə azalmasına hazırlıq görmək istəyirlər.
ABŞ qoşunlarının çıxarılmasının Almaniya və İtaliyada yerləşən əsas Amerika hərbi bazalarına ciddi təsir göstərəcəyi gözlənilir.
Regionun müdafiə strukturlarının nümayəndələri bildirirlər ki, Avropa qüvvələri döyüş hazırlığına malikdir, lakin hazırkı ABŞ hərbi kontingentini əvəz etmək baxımından hələ kifayət qədər hazır deyillər. Xüsusilə aviasiya, logistik və peyk sistemləri kimi mürəkkəb və baha imkanlar baxımından Avropa ölkələrinin ciddi çatışmazlıqları mövcuddur.
NATO sammiti ərəfəsində ABŞ-ın NATO-dakı səfiri Metyu Vitaker bəyan edib ki, ABŞ qoşunlarının Avropada yerləşdirilməsinə dair Pentaqonun qiymətləndirməsi “yayın sonuna və ya payızın əvvəlinə qədər yekunlaşdırılmalıdır”.
Musavat.com
