ain.az, Bizimyol portalına istinadən məlumat verir.
İstanbul Baş Prokurorluğu Türkiyənin məşhur satirik jurnalı "Leman"ın Məhəmməd peyğəmbərin karikaturasını dərc etdiyinə görə istintaqa başlayıb.
Bizimyol.info xəbər verir ki, "trthaber"in verdiyi məlumata görə, karikaturanın müəllifi saxlanılıb.
“İstanbul Baş Prokurorluğu Türkiyə Cinayət Məcəlləsinin 216-cı maddəsinə uyğun olaraq jurnalda dərc olunan Məhəmməd peyğəmbərin karikaturası ilə bağlı dindarların hisslərinin açıq şəkildə təhqir edilməsi faktı ilə bağlı məhkəmə araşdırmasına başlayıb.
Heç bir azadlıq müqəddəs şeyləri bu qədər iyrənc şəkildə ələ salmaq haqqı vermir”, - deyə Türkiyə Ədliyyə Nazirliyinin rəhbəri Yılmaz Tunç "X"dəki səhifəsində yazıb.
O, “Məhəmməd peyğəmbərin karikaturaları və ya onu ümumən təsvir etməyə cəhdlərin təkcə dini dəyərlərə deyil, həm də ictimai asayişə ziyan vurduğuna” diqqət çəkib.
“Milyonlarla müsəlmanın inanclarına məhəl qoymayan bu təxribata qarşı dərhal lazımi hüquqi tədbirlər görüləcək”, - deyə nazir əlavə edib.
Telekanal xəbər verir ki, jurnalda çəkilmiş karikaturanın müəllifi saxlanılıb. Prokurorluq “Leman”ın 4 redaktorunun həbsinə icazə verib.
Jurnal iyunun 26-da Məhəmməd və Musa peyğəmbərlərin karikaturalarını dərc edib. Türkiyə rəhbərliyinin nümayəndələri bu nəşri kəskin tənqid ediblər.
Qadir, Bizimyol.info
Hadisənin gedişatını izləmək üçün ain.az saytında ən son yeniliklərə baxın.
