Son həftələrdə İran ilə İsrail arasında baş verən hərbi toqquşmalar fonunda, İran rəsmiləri və rejimə bağlı media orqanları Azərbaycan Respublikasına qarşı bir sıra əsassız və sübutsuz iddialar irəli sürmüşlər. Bu iddialara əsasən, guya İsrailin pilotsuz uçan aparatları (PUA) və döyüş təyyarələri Azərbaycanın hava məkanından istifadə edərək İrana hücumlar təşkil etmişdir. Halbuki, bu günə qədər bu iddiaları təsdiqləyən heç bir peyk görüntüsü, uçuş marşrutu və ya beynəlxalq səviyyədə tanınan sübut təqdim edilməyib.
Azərbaycan Respublikası isə bu iddiaları qətiyyətlə rədd etmiş və rəsmi şəkildə bəyan etmişdir ki:
“Azərbaycan Respublikasının hava məkanı heç vaxt və heç bir halda İran İslam Respublikasına qarşı istifadə edilməyib və buna icazə verilməyəcək.”
Bu ittihamların məqsədi nədir?
Fars-molla rejiminin bu cür əsassız ittihamlar irəli sürməsi göstərir ki, bu rejimin əsas məqsədi yalnız xarici təhdidlərə qarşı ictimai dəstək yaratmaq deyil, daxildəki siyasi leqitimliyini qorumaq, Güney Azərbaycanın türk əhalisi ilə Azərbaycan Respublikası arasında etimadsızlıq yaratmaq və İran rejimini guya türk millətinin müdafiəçisi kimi təqdim etməkdir.
Bu taktika sovet dövründə tanıdığımız “qırmızı terror” və Stalinist təbliğat üsullarını xatırladır. Xarici düşmən obrazı yaradılaraq, daxili problemlərin üstü örtülür və ictimai diqqət əsas sosial-siyasi məsələlərdən yayındırılır.
Bu iddiaların əsassız olduğunu göstərən əsas faktlar
1. Uçuş və peyk məlumatları:
Müstəqil mənbələr (məsələn, FlightRadar24) və beynəlxalq müşahidəçilər tərəfindən indiyədək heç bir sübut təqdim olunmayıb ki, İsrail PUA-ları və ya hərbi təyyarələri Azərbaycan ərazisindən İrana qarşı hərbi əməliyyat həyata keçirib.
2. Rəsmi Bakının mövqeyi:
Azərbaycan Respublikasının Prezidenti İlham Əliyev açıq şəkildə bəyan edib:
“Azərbaycanın hava məkanı heç bir ölkəyə qarşı istifadə olunmayıb və bu məsələdə İran bizim dost və qardaş ölkəmizdir.”
3. Yanacaq məsələsi:
İran mediası guya İsrail döyüş təyyarələrinin Azərbaycan yanacağı ilə havaya qalxdığını iddia edir. Bu iddia tamamilə əsassızdır, çünki Azərbaycan nefti beynəlxalq bazarda müxtəlif müstəqil şirkətlər tərəfindən alınır və bu neftin son alıcısı üzərində dövlətin birbaşa nəzarəti yoxdur.
Fars-molla rejiminin bu təbliğat kampaniyasının məqsədləri
Güney Azərbaycandakı 40 milyon türkün fikrini çaşdırmaq və Azərbaycan Respublikası ilə aralarına süni gərginlik toxumu səpmək
Daxildə repressiv tədbirləri “milli təhlükəsizlik” adı altında əsaslandırmaq, milli-mədəni fəallara qarşı saxta ittihamlar irəli sürmək
Xarici hücumlar qarşısında rejimin zəifliyini pərdələmək
Özlərini Güney Azərbaycanda yaşayan türklərin guya yeganə müdafiəçisi kimi təqdim etmək
İran rejimi anlamalıdır ki, 50 milyondan artıq azərbaycanlını təmsil edən yeganə hüquqi və siyasi qüvvə Azərbaycan dövlətidir. Məhz buna görə Azərbaycan Respublikası dəfələrlə diplomatik yollarla İsrail tərəfinə açıq şəkildə çatdırıb ki, Güney Azərbaycanın şəhərlərində sivil əhalinin təhlükəyə məruz qalması yolverilməzdir və hərbi əməliyyatlarda bu məsələ ciddi şəkildə nəzərə alınmalıdır.
