Rusiyada doğum göstəricilərinin artmamasının ən mühüm səbəblərindən biri vətəndaşların “öz həyatlarını yaşamaq istəyi”dir.
Hafta.az-ın yazdığına görə, Sankt-Peterburq Beynəlxalq İqtisadi Forumunda (PMEF) çıxış edən VTsİOM-un baş direktoru Konstantin Abramov bildirib ki, müasir ruslar uşaq sahibi olmağı şəxsi azadlığı məhdudlaşdıran və baha başa gələn bir yük kimi görürlər.
"Ailə qurmaq və uşaq sahibi olmaq üçün sevgi lazım ola bilər, lakin uşaq böyütmək üçün xərclər və şəxsi xoşbəxtlik axtarışları buna mane olur", - Abramov bildirib.
Forumda çıxış edən digər ekspert, Elmi-Sosial Ekspertiza İnstitutunun baş direktoru Sergey Rıbalçenko bildirib ki, Rusiyada ümumi doğum əmsalı 1,4 uşaq səviyyəsində qalıb. Bu göstəricinin əhalinin özünü yeniləməsi üçün tələb olunan 2,1-dən xeyli aşağı olduğunu vurğulayan Rıbalçenko dünyada ümumi göstəricinin də tarixən aşağı olan 2,3 səviyyəsinə düşdüyünü xatırladıb. Bununla belə, o, bəzi ölkələrlə müqayisədə Rusiyada hələ də nisbətən yüksək doğum səviyyəsinin olduğunu bildirib.
Qlobal məlumatlara görə, bütün dünyada doğuş nisbətləri kəskin şəkildə aşağı düşür.
Birləşmiş Millətlər Təşkilatının Əhali Fondunun (UNFPA) dərc etdiyi son hesabatda ABŞ, Hindistan, Braziliya və Almaniya da daxil olmaqla 14 ölkədə aparılan sorğunun nəticələri yer alıb. Respondentlərin hər 5 nəfərindən biri maddi imkansızlıq ucbatından istədikləri qədər uşaq sahibi ola bilmədiklərini bildirib.
Bundan əlavə, iş və ailə həyatının tarazlaşdırılması, dövlət dəstəyinin olmaması, sağlamlıq problemləri və siyasi qeyri-müəyyənlik uşaq sahibi olmaq qərarına təsir edən əsas amillər kimi göstərilib.
