Rusiyada ali təhsil sistemi köklü transformasiyadan keçir. Təhsil Nazirliyi tərəfindən hazırlanan qanun layihəsində 2027-ci ildən bakalavr və magistratura pillələrinin ikili strukturunun ləğvi, iki pilləli “baza” və “ixtisas” olmaqla yeni modelin tətbiqi təklif olunur. Yeni sistemin əsas məqsədi tələbələrə daha hərtərəfli peşə hazırlığını təmin etmək və məzunların əmək bazarında səriştəsini artırmaqdır. İslahat hazırda altı əsas universitetdə sınaqdan keçirilir və tədricən mindən çox ali təhsil müəssisəsinə qədər genişləndirilməsi planlaşdırılır.
Hafta.az-ın Gazeta.ru-ya istinadən yazdığına görə, əsas ali təhsil dörd ildən altı ilədək davam edəcək və tələbələri birbaşa iş həyatına hazırlayacaq. İxtisaslaşma mərhələsi bir ildən üç ilədək olacaq və klassik magistratura, assistentlik-staj və tibb ixtisası kimi proqramları əhatə edəcək. Bundan əlavə, doktorantura təhsili elmi və akademik kadrların hazırlanmasına yönəlmiş müstəqil təhsil səviyyəsi kimi yenidən qurulacaq.
Nazir Valeri Falkovun sözlərinə görə, bu yeni struktur hazırkı bakalavr pilləsinin dövlət sektorunda tam ixtisas hesab olunmaması kimi problemləri aradan qaldıracaq və məzunların işlə təmin olunmasını artıracaq.
2023-cü ildən pilot tətbiqlər Moskva Aviasiya İnstitutu, MISiS, Moskva Dövlət Pedaqoji Universiteti, Kant Baltik Federal Universiteti, Sankt-Peterburq Mədən Universiteti və Tomsk Dövlət Universiteti kimi aparıcı qurumlarda həyata keçirilir. Hazırda 173 yeni təhsil proqramı üzrə beş mindən çox tələbə təhsil alır. Bu təcrübələrin 2025-ci ildən etibarən digər universitetlərə də yayılması, 2026-cı ilə qədər isə sistemin mindən çox qurumda tətbiq edilməsi planlaşdırılır. 1 sentyabr 2027-ci il tarixindən etibarən yeni model bütün ölkə üzrə qüvvəyə minəcək. Hazırkı tələbələr köhnə sistemdə təhsillərini başa vura biləcəklər, lakin yeni keçid yolları və modul uyğunlaşdırma mexanizmləri də işə salınacaq.
İslahat çərçivəsində yeni qəbul qaydaları, təhsil standartları və ixtisaslar da hüquqi cəhətdən müəyyən ediləcək. Fakültənin professor-müəllim heyəti üçün yeni metodik təlimlər keçiriləcək. Nazirlik islahatın cəmiyyət və iş dünyası tərəfindən müsbət qarşılandığını vurğulayır və prosesin həm tələbələrin hüquqlarını qoruyacaq, həm də universitetlərə yeni sistemə uyğunlaşmaq üçün kifayət qədər keçid vaxtı təmin edəcək şəkildə həyata keçiriləcəyinə zəmanət verir.
