Yeni biznes ideyasının yaranması sahibkar üçün həyəcanverici olsa da, onun uğur potensialını müəyyənləşdirmək bəzən çətin olur. Lakin müəyyən göstəricilər vasitəsilə bu ideyanın reallaşma ehtimalını qiymətləndirmək mümkündür.
Valyuta.az xəbər verir ki, "Charles Stanley" şirkətinin maliyyə eksperti Aaron Gibbs 2024-cü ildə ideyanın gələcəyi olub-olmadığını göstərən 7 əsas amili təqdim edib.
1. Problemə həll təqdim etməsi
Hər bir məhsul və ya xidmət real bir ehtiyacı və ya problemi həll etməlidir. İdeyanız kimə lazımdır və niyə indi bazarda yoxdur? Ola bilər ki, siz mövcud məhsulu daha yaxşı və ya daha münasib qiymətə təqdim edəcəksiniz – bu da bir üstünlükdür.
2. Rəqabət mühiti
Sahəyə daxil olduqda kimlərlə rəqabət aparacağınızı bilməlisiniz. Əgər sektorda çoxlu rəqib varsa, bu həm riskdir, həm də keyfiyyətin artmasına səbəb ola bilər. Məsələn, "British Airways" və "EasyJet" fərqli müştəri seqmentlərinə xidmət göstərir. Sizin biznes bu rəqiblərin arasında necə mövqe tuta bilər?
3. İstehsal və xidmət xərcləri
Bir məhsulun istehsalı və ya xidmətin göstərilməsi üçün tələb olunan xərclər ideyanın kommersiya baxımından səmərəli olub-olmadığını müəyyən edir. Təchizat zəncirindəki problemlər, logistika, valyuta dəyişmələri və material qiymətləri gəlirə birbaşa təsir edə bilər.
4. Qiymət siyasəti
Məhsulun dəyəri onu almağa hazır olan müştərinin ödəyəcəyi məbləğdir. Qiymət təyin etməzdən əvvəl potensial alıcının ödəmə qabiliyyətini və istəyini müəyyənləşdirmək vacibdir. Bu mərhələdə sorğular, müsahibələr və fokus qrupları vasitəsilə məlumat toplamaq tövsiyə olunur.
5. Miqyaslanma və bazar potensialı
İdeya nə qədər geniş auditoriyaya xitab edir? Bazar kifayət qədər böyük və inkişaf yönümlüdürmü? Süni intellekt kimi yeni texnoloji trendlər sizin xeyrinizə işləyə bilərmi? Həmçinin, ideyanın digər bazarlara çıxış və gəlir diversifikasiyası baxımından potensialı nəzərə alınmalıdır.
6. Davamlılıq və uzunömürlülük
“Dəb dalğasında” yaranan ideyalar qısa müddət ərzində populyar ola bilər, lakin davamlı biznes modeli yaratmaq üçün uzunmüddətli perspektiv vacibdir. Məsələn, "Peloton" pandemiya dövründə məşhurlaşsa da, sonradan maraq azalıb və şirkətin səhmlərinin dəyəri kəskin şəkildə düşüb.
7. Müştəri rəyi və ilkin maraq
Potensial müştərilərdən alınan müsbət rəy ideyanızın bazarda qarşılıq tapa biləcəyini göstərir. Fokus qruplar, sorğular və prototiplər vasitəsilə ilkin reaksiyalar toplamaq vacibdir. Əgər müştərilər maraq göstərir və konstruktiv rəy verirsə, bu, ideyanın gələcək uğuruna işarədir.
Ekspert dəstəyi də vacibdir. “Charles Stanley” mütəxəssisləri qeyd edir ki, biznesin qurulması zamanı hüquq, vergi və maliyyə planlaşdırması sahəsində peşəkar dəstək vacibdir. Bu zaman sahibkar həm şəxsi, həm də ailəvi maliyyə hədəflərini daha düzgün şəkildə müəyyən edə və bizneslə şəxsi sərvət arasında balans yarada bilər.
Sərvanə Rəmixanova
