Olaylar xəbər verir ki, bunu "Masdar" şirkətinin Azərbaycandakı nümayəndəliyinin rəhbəri Murad Sadıxov 31-ci Beynəlxalq Xəzər Neft və Qaz sərgisi çərçivəsində keçirilən panel müzakirəsində deyib.
"Bununla yanaşı, şəbəkəyə güc verilişi üzrə müəyyən limit mövcuddur. Stansiya daha çox elektrik enerjisi istehsal etmək qabiliyyətinə malikdir, lakin şəbəkə infrastrukturundakı məhdudiyyətlər səbəbindən biz bütün potensial istehsal həcmini şəbəkəyə ötürə bilmirik", - deyə o bildirib.
O, həmçinin vurğulayıb ki, iqlim dəyişikliyi fonunda bərpa olunan enerji layihələri üçün generasiyanın proqnozlaşdırılması əsas risklərdən birinə çevrilir.
"Biz may ayında baş verənləri gördük: güclü yağıntılar, dolu və digər qeyri-adi hava hadisələri", - deyə o qeyd edib.
Onun sözlərinə görə, bu cür iqlim dəyişikliklərini stansiyanın layihələndirilməsi və istismar proqnozlarının hazırlanması mərhələsində tam şəkildə nəzərə almaq mümkün olmayıb.
O əlavə edib ki, "Qaradağ" Günəş Elektrik Stansiyası enerji yığım sistemi ilə təchiz edilməyib, çünki layihə ilkin mərhələdə pilot layihə kimi icra olunub: "Oxşar vəziyyət icra mərhələsində olan digər iki günəş layihəsinə - Biləsuvar və Neftçala layihələrinə də aiddir."
Bununla belə, onun fikrincə, gələcəkdə hökumət tədricən enerji saxlama sistemlərini tətbiq edəcək.
O, nümunə kimi "Azərenerji" tərəfindən icra olunan ölkənin ilk battareya enerji saxlancı sistemi layihəsini göstərib. 250 MVt gücə və 500 MVt/saat tutuma malik olan bu sistem enerji sistemində tezliyin və elektrik axınlarının tənzimlənməsi üçün nəzərdə tutulur.
Ümumilikdə, onun sözlərinə görə, ilk böyük günəş layihəsi statusu bir çox bərpa olunan enerji mənbələri obyektlərinin üzləşdiyi şəbəkə problemlərindən yayınmağa imkan verib.
"Şükürlər olsun ki, bu çağırışlar hələlik bizim işimizə ciddi təsir göstərməyib", - deyə o əlavə edib.
