Yeni Azərbaycan Partiyası (YAP) Tərtər rayon təşkilatının inzibati binasında 1 İyun – Beynəlxalq Uşaqlar Günü münasibətilə bayram tədbiri keçirilib.
Tədbir başlamazdan əvvəl Azərbaycanın Ümummilli Lideri Heydər Əliyevin və Vətən uğrunda canından keçən şəhidlərimizin əziz xatirəsi bir dəqiqəlik sükutla yad edilib.
Tədbirdə Tərtər Rayon İcra Hakimiyyətinin başçısı Müstəqim Məmmədov, YAP Tərtər rayon təşkilatının sədri Eldar Əsədov, həmçinin şəhid və qazi ailələrinin övladları iştirak ediblər.
Tədbiri giriş sözü ilə açan YAP Tərtər rayon təşkilatının sədri Eldar Əsədov uşaqları təbrik edərək bildirdi ki, 1 İyun – Beynəlxalq Uşaqlar Günü təkcə bayram deyil, eyni zamanda cəmiyyətimizin gələcəyi olan uşaqlara göstərilən dövlət qayğısının növbəti təzahürüdür. E.Əsədov xüsusi vurğuladı ki, Vətən uğrunda canından keçən şəhidlərimizin və qazilərimizin övladları xalqımız üçün çox əzizdir. Onların firavanlığı, sağlam və savadlı bir vətəndaş kimi yetişməsi, eləcə də sosial ehtiyaclarının təmin olunması hər birimizin mənəvi borcudur. Rayon təşkilatının sədri qeyd etdi ki, Yeni Azərbaycan Partiyası bu istiqamətdə müxtəlif sosial layihələr həyata keçirir və şəhid ailələrinin övladlarının təhsili, asudə vaxtlarının səmərəli təşkili məsələlərini daim diqqət mərkəzində saxlayır.
Sonra çıxış edən Tərtər Rayon İcra Hakimiyyətinin başçısı Müstəqim Məmmədov uşaqları 1 İyun – Beynəlxalq Uşaqlar Günü münasibətilə səmimi qəlbdən təbrik edib. Müstəqim Məmmədov qeyd edib ki, Azərbaycanda uşaqların hüquqlarının qorunması, onların yüksək standartlar əsasında böyüməsi, milli-mənəvi dəyərlərə sadiq və vətənpərvər ruhda tərbiyə olunması dövlət siyasətinin prioritet istiqamətlərindəndir. O, bu istiqamətdə görülən işlərin ölkə rəhbərliyinin tapşırıqları əsasında rayonda uğurla davam etdirildiyini bildirib.
Tədbirin bədii hissəsində uşaqlar tərəfindən şeirlər səsləndirilib. Sonra YAP Tərtər rayon təşkilatı tərəfindən uşaqlara bayram hədiyyələri təqdim olunub. Balacaların sevincinə səbəb olan bu addım onlarda xoş təəssürat yaradıb.
Tədbirdə şəhid və qazi valideynləri göstərilən diqqətə görə Yeni Azərbaycan Partiyasına öz təşəkkürlərini bildiriblər.
Görüş xatirə şəklinin çəkdirilməsi ilə yekunlaşıb.
