Binalar da, mənzillərin interyeri də atelyenin firma üslubunda hazırlanacaq
Məşhur tüninq atelyesi Brabus daşınmaz əmlak sahəsində yeni layihəsinin eskizlərini təqdim edib. Abu-Dabi üçün Brabus Island yaşayış kompleksini anons etdikdən sonra atelye diqqətini Azərbaycana yönəldib: yeni lüks yaşayış kompleksi Bakının şəhərətrafı ərazisində, Xəzər dənizinin sahilində inşa olunacaq.
Brabus Island Baku kompleksi təxminən 115 min kvadratmetr ərazini əhatə edəcək. Bu ərazidə studiyalardan tutmuş iki səviyyəli rezidensiyalara qədər 592 adi apartament, həmçinin 16 ayrıca villa tikiləcək. Yaşayış sahələri ilə yanaşı, kompleksin tərkibində launj-zonalar, fitnes və spa mərkəzləri də yaradılacaq.
Layihədə həm yaşayış kompleksinin unikal eksteryeri, həm də rezidensiyaların fərdi interyer dizaynları vəd olunur. Hər iki istiqamətin Brabus-un firma üslubunda hazırlanması planlaşdırılır. Daşınmaz əmlakın qiyməti də daxil olmaqla digər təfərrüatlar hələ açıqlanmır. Bununla belə, mənzil almaq üçün müraciətlərin qəbuluna artıq başlanılıb.
Brabus Island layihəsinin yerləşdirilməsi üçün Azərbaycanın seçilməsini şirkət ölkə paytaxtının inkişaf səviyyəsi ilə izah edib. Bakı beynəlxalq mədəniyyət və müasir elit həyat mərkəzi, Azərbaycan isə Avropa ilə Asiya arasında ən dinamik inkişaf edən regionlardan biri adlandırılıb.
Abu-Dabidəki Brabus Island oxşar üslubda hazırlanıb və Bakıdakı “ada” kimi sahildə yerləşir, lakin miqyasına görə ondan xeyli böyükdür.
