Avstraliyanın Kvinslend ştatının şimal sahillərində, dərinsulu Kenedi Şol rifində nizə ilə balıq ovlayan 39 yaşlı kişi akula hücumuna məruz qalaraq dünyasını dəyişib.
AFN.az xəbər verir ki, yerli polisin məlumatına görə, bu hadisə Avstraliyada ilin əvvəlindən bəri ölümlə nəticələnən üçüncü akula hücumu olub.
Kerns şəhərinin sakini olan zərərçəkmiş hadisə zamanı üç dostu ilə birlikdə suda olub və baş nahiyəsindən aldığı kritik xəsarət səbəbindən hadisə yerindəcə keçinib.
Dostları tərəfindən sudan çıxarılan yaralını xilas etmək üçün sahil mühafizəsinə zəng edilsə də, bir saatdan çox davam edən sahilə doğru hərəkət zamanı tibbi müdaxilə çatdırılana qədər həyatını xilas etmək mümkün olmayıb.
Polisin və yerli balıqçıların verdiyi məlumata görə, ərazidə son vaxtlar aqressivliyi ilə seçilən öküz akulaları müşahidə edilir.
Bond Universitetinin akula mütəxəssisi Daril Makfi ştatın şimalında belə ölümcül hadisələrin nadir qeydə alındığını, nizə ilə balıq ovunun digər su fəaliyyətlərinə nisbətən daha yüksək risk profilinə malik olduğunu bildirib.
Qeyd edək ki, bu faciə bir həftə əvvəl Qərbi Avstraliyada 38 yaşlı Stiv Mattabonninin böyük ağ akula tərəfindən öldürülməsindən, eləcə də yanvarın 18-də Sidney sahillərində 12 yaşlı Niko Antikin ölümcül xəsarət almasından sonra ölkədə cari il ərzində qeydə alınan üçüncü oxşar bədbəxt hadisədir.
