“Amazon” şirkətinin rəhbəri Ceff Bezos ABŞ-da aşağı gəlirli vətəndaşlardan federal gəlir vergisinin alınmamasını təklif edib.
HİT.az xəbər verir ki, bu barədə CNBC məlumat yayıb.
Bezos “Squawk Box” proqramında bildirib ki, ABŞ vergi sistemində aşağı gəlirli əhali üzərindəki vergi yükü çox kiçik olsa da, prinsipial olaraq ədalətli deyil.
Onun sözlərinə görə, ölkədə vergi ödəyicilərinin ən varlı 1%-i ümumi vergi gəlirlərinin təxminən 40%-ni, aşağı yarısı isə cəmi 3%-ni ödəyir.
“Düşünürəm ki, bu 3% olmamalıdır. Məncə, bu, sıfır olmalıdır”, deyə o bildirib.
Bezos əlavə edib ki, aşağı gəlirli insanların ödədiyi gəlir vergisi federal büdcə üçün əhəmiyyətli məbləğ təşkil etmir və nümunə olaraq illik 75 min dollar qazanan tibb bacısını göstərib.
“Biz bu tibb bacısından Vaşinqtona pul göndərməsini istəməməliyik. Əksinə, ona üzr göndərməliyik”, deyə o qeyd edib.
O həmçinin vurğulayıb ki, bu mövqeyi müdafiə edəcək, lakin belə dəyişikliklərin qanunvericiliklə necə həyata keçirilə biləcəyi barədə detallı plan təqdim etməyib.
Məqalədə qeyd olunur ki, hazırkı iqtisadi və geosiyasi vəziyyət fonunda aşağı gəlirli ailələr yanacaq kimi xərclərə daha çox pay ayırmaq məcburiyyətində qalır və bu da “iki fərqli iqtisadi reallıq” yaradır.
Samir
