Bakı, 21 may, AZƏRTAC
Kənd Təsərrüfatı və Gənclər və İdman nazirliklərinin dəstəyi, “Enterprise Azərbaycan”, İnnovasiya və Rəqəmsal İnkişaf Agentliyi və “Azmaş Lizinq” MMC-nin tərəfdaşlığı, Aqrar İnkişaf Könüllüləri Təşkilatının təşkilatçılığı ilə “Farm2Tour” hakatonu keçirilib.
Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsindən AZƏRTAC-a bildirilib ki, hakaton çərçivəsində 40 nəfər iştirakçı 5 nəfərlik komandalar şəklində bir araya gələrək aqroturizm obyektlərinin tanıdılması, turist-fermer əlaqəsinin gücləndirilməsi və istifadəçi təcrübəsinin təkmilləşdirilməsinə yönəlmiş rəqəmsal məhsullar hazırlayıblar. İştirakçılar 36 saat ərzində hazırladıqları layihələri münsiflər heyətinə təqdim ediblər.
Proses boyu komandalara mentor dəstəyi göstərilib, ən perspektivli həllər isə növbəti inkubasiya və inkişaf mərhələsinə yönləndirilməsi üçün seçilib. Hakatonun yekun nəticələrinə əsasən 3 startap qalib elan olunub.
Tədbirin bağlanış mərasimində dövlət qurumlarının nümayəndələri və layihə tərəfdaşları iştirak ediblər.
Layihənin davamlılığının təmin olunması məqsədilə İnnovasiya və Rəqəmsal İnkişaf Agentliyi tərəfindən qalib layihələrə inkubasiya mərhələsində dəstək göstərilməsi nəzərdə tutulur. Eyni zamanda, İqtisadi İslahatların Təhlili və Kommunikasiya Mərkəzi – Enterprise Azerbaijan portalı startup potensialına malik layihələrin “Startup School 4” proqramına cəlb olunmasına və həmin komandaların beynəlxalq startup ekosisteminə inteqrasiyasına dəstək verəcək.
Qeyd edək ki, “Farm2Tour” layihəsi aqroturizm sahəsində mövcud çağırışlara AI əsaslı rəqəmsal həllərin hazırlanmasına həsr olunmuş innovasiya layihəsidir.
