Dayanıqlı şəhəri yalnız dayanıqlı cəmiyyət olduqda qura bilərik.
APA xəbər verir ki, bunu QHT-lərə Dövlət Dəstəyi Agentliyinin İdarə Heyətinin sədri, WUF13 Təşkilat Komitəsinin üzvü Aygün Əliyeva “İqlim böhranı qarşısında adekvat mənzil, torpaq və əsas xidmətlər üçün icma rəhbərliyi ilə fəaliyyət” mövzusunda keçirilən dəyirmi masada deyib.
O bildirib ki, dayanıqlı şəhərlər insanların həmrəyliyi, inancları üzərində qurulur: “Azərbaycan hazırda dünyanın ən böyük postmünaqişə yenidənqurma və şəhər bərpası proseslərindən birini həyata keçirir. Qarabağ və Şərqi Zəngəzurun azad edilmiş ərazilərində işğal dövründə dağıdılmış şəhər və kəndlər sıfırdan yenidən qurulur. Dayanıqlılıq və insan mərkəzli inkişaf prinsiplərinə əsaslanan ağıllı şəhərlər və ağıllı kəndlər, yaşıl enerji zonaları və müasir urban ekosistemlər yaradılır.
Lakin şəhərlərin yenidən qurulması yalnız yollar, binalar və infrastruktur demək deyil. Əsl çağırış insan hüquqlarını, sosial etimadı və insanların gələcəyə inamını bərpa etməkdir. Məhz buna görə yerli təşəbbüslər və vətəndaş cəmiyyəti bu qədər vacibdir”.
O deyib ki, vətəndaş cəmiyyəti təşkilatları çox zaman icmaların problemlərini ilk eşidən və çətin dövrlərdə insanlara ilk dəstək göstərən qurumlar olur: “Onlar institutlarla cəmiyyət arasında etimad yaradır və inkişafın insanların real ehtiyacları ilə bağlı qalmasına kömək edirlər.
Bu gün Azərbaycan həmçinin qlobal Şimal ilə qlobal Cənub arasında mühüm körpü rolunu oynayır, dialoq və beynəlxalq əməkdaşlığı təşviq edir. Çünki biz şəhərlərin gələcəyini müzakirə edərkən, əslində bəşəriyyətin gələcəyini müzakirə edirik.
Bu baxış insanların birləşdiyi, onları ayıran sərhədlərin aradan qalxdığı, hər bir insanın təhlükəsiz və hörmət olunduğu, şəhərlərin isə ləyaqət, inklüzivlik və imkan məkanlarına çevrildiyi bir dünyanı nəzərdə tutur. Çünki bu şəhərlər yalnız betonla qurulmur. Onlar həmrəylik, ortaq məsuliyyət və insanların ümumi gələcəyə inamı ilə qurulur”.
