BAKI, 21 may. TELEQRAF
“Bu il keçiriləcək BMT-nin Su Konfransı həm üzv dövlətləri, həm də bütün maraqlı tərəfləri qlobal su çağırışlarını müzakirə etmək üçün bir araya gətirən kritik əhəmiyyətli bir hadisədir. Biz bu beynəlxalq konfransda tamamilə praqmatik olmalıyıq".
Teleqraf xəbər verir ki, bunu BMT-nin Məskunlaşma Proqramının (UN-Habitat) icraçı direktoru Anaklaudia Rossbax Ümumdünya Şəhərsalma Forumunun 13-cü sessiyası (WUF13) çərçivəsində “2026-cı il Su Konfransı: Şəhər mənzillərinin yol xəritəsi" mövzusuna həsr olunmuş tədbirdə bildirib.
O qeyd edib ki, Ümumdünya Şəhərsalma Forumunun (WUF13) Bakı sessiyaları ərzində müzakirə olunan bir çox fundamental məsələlərihəmin su konfransının gündəliyinə daşımaq lazımdır:
“Bizim "Su Operatorları Alyansımız" (Alliance of Water Operators) mühüm və effektiv bir mexanizmdir. Bu təşəbbüs bəşəriyyətin rifahı üçün qlobal bir ictimai nemətdir və biz onu BMT-nin konfransına əsas çıxış layihəsi kimi təqdim edirik. Əsas məqsədimiz su resurslarının ehtiyacı olan hər bir şəxsə, xüsusilə də ən həssas təbəqələrə çatmasını təmin etmək və bu sahədə mövcud olan boşluqları aradan qaldırmaq üçün mühüm bir körpü yaratmaqdır”.
BMT rəsmisi bu yanaşmanın Ümumdünya Şəhərsalma Forumunun ana xətti ilə tam uzlaşdığını qeyd edib: “Bu proses fərqli tərəflərin və qurumların qarşılıqlı təcrübə mübadiləsinə əsaslanır. Tədbirimizin digər ən kritik aspekti isə birbaşa mənzil təminatıdır. Çünki mənzil həm bu forumun əsas mövzusu, həm də bizim yaxın gələcək üçün qəbul etdiyimiz strateji inkişaf planımızın ən mühüm prioritet istiqamətidir. Keyfiyyətli mənzil təminatını dayanıqlı su infrastrukturu olmadan təsəvvür etmək qeyri-mümkündür”.
