Azərbaycan münaqişədən sonra yenidənqurma işlərinə təxminən 15 milyard ABŞ dolları xərcləyib.
İnterpress.az xəbər verir ki, bunu Azərbaycan xarici işlər nazirinin müavini Yalçın Rəfiyev WUF13 çərçivəsində keçirilən “Böhrandan sonra bərpa və yenidənqurmanın mərkəzində mənzil məsələsi” adlı tədbirdəki çıxışında deyib.
Onun sözlərinə görə, hökumət hər il dövlət büdcəsinin təxminən 25 faizini bu istiqamətə ayırıb.
Nazir müavini bildirib ki, hər bir ölkənin və hər bir vəziyyətin özünəməxsus çətinlikləri var, Azərbaycan üçün bu çətinliklərdən biri minalardır.
“Bərpa və yenidənqurma prosesinə başlamaq üçün əlverişli mühit olmalıdır. İşğaldan azad edilmiş ərazilərdə 1,5 milyon mina basdırılmışdı. Bərpa və yenidənqurmaya başlamazdan əvvəl onların təmizlənməsi lazım idi. Bu isə o deməkdir ki, maliyyə və siyasi baxımından hazır ola bilərsiniz, məsələn, sülh sazişi və ya atəşkəs mövcud ola bilər, amma ərazilərdə minalar olduğu üçün həmin bölgələrə daxil olmaq və bərpaya başlamaq mümkün olmur. Lakin düşünürəm ki, son bir neçə ildə formalaşdırdığımız model dünyaya, o cümlədən münaqişədən zərər çəkmiş ölkələrə yaxşı nümunədir: əgər hər şeyi sıfırdan yaradırsansa, daha yaxşı qurmalısan”, – Yalçın Rəfiyev qeyd edib./apa
