Yaxın Şərqdə yaranan yeni enerji böhranı fonunda Böyük Britaniyanın Rusiyaya qarşı bəzi sanksiyaları yumşaltması narahatlıq yaradıb...
Poliqon The Telegraph-a istinadən xəbər verir ki, bu qərar ölkənin enerji təhlükəsizliyi sahəsindəki zəifliyini açıq şəkildə göstərir.
Starmer hökumətinin qərarı
Böyük Britaniyanın Baş naziri Kir Starmer hökuməti ölkəyə müəyyən həcmdə dizel və aviasiya yanacağının idxalına icazə vermək üçün Rusiyaya qarşı tətbiq olunan bəzi məhdudiyyətləri faktiki olaraq yumşaldıb.
Baş nazir bu addımın Moskva əleyhinə yeni sərt sanksiyalar paketindən əvvəl atıldığını bildirsə də, nəşr hesab edir ki, qərarın özü Britaniyanın enerji sahəsində nə qədər həssas vəziyyətdə olduğunu göstərir.
Məqalədə qeyd olunur ki, hökumət yay aylarında mümkün aviasiya yanacağı çatışmazlığından ehtiyatlandığı üçün bu addımı atmağa məcbur olub.
Britaniya enerji baxımından risk altındadır
The Telegraph-ın məlumatına görə, Böyük Britaniya Avropada aviasiya yanacağının ən böyük xalis idxalçısı hesab olunur. Bu isə ölkəni enerji təchizatındakı pozuntular qarşısında xüsusilə həssas edir.
Nəşr vurğulayır ki, Hörmüz boğazının bağlanması kimi risklər Britaniyanın enerji təhlükəsizliyi üçün ciddi təhlükə yaradır. Çünki ölkəyə gətirilən yanacağın böyük hissəsi məhz bu marşrutdan keçir.
Ekspertlər hesab edir ki, Britaniya enerji ehtiyaclarının daha böyük hissəsini daxili resurslar hesabına ödəməyə çalışmalı və strateji yanacaq ehtiyatlarını artırmalıdır.
Neft emalı zavodlarının sayı kəskin azalıb
Məqalədə bildirilir ki, Böyük Britaniya illərdir "dəqiq vaxtında təchizat" modelindən istifadə edir. Bu sistem anbar xərclərini azaltsa da, fövqəladə vəziyyətlər zamanı ehtiyat imkanlarını minimuma endirir.
Hazırda ölkənin kerosin ehtiyatlarının təxminən bir aylıq olduğu qeyd edilir.
Eyni zamanda Britaniyada neft emalı sənayesi də zəifləyib. 1970-ci illərdə ölkədə 18 neft emalı zavodu fəaliyyət göstərirdisə, 2025-ci ildə daha iki müəssisənin bağlanmasından sonra onların sayı cəmi dördə düşüb.
Jurnalistlərin fikrincə, bu vəziyyətin əsas səbəblərindən biri biznes üçün yüksək enerji qiymətləri və ekoloji vergilərdir.
Yeni enerji siyasəti çağırışı
The Telegraph hesab edir ki, Britaniya hökuməti Şimal dənizində yeni neft və qaz hasilatı lisenziyaları verməli, həmçinin son illərdə bağlanan neft emalı zavodları ilə bağlı siyasətini yenidən nəzərdən keçirməlidir.
Nəşr vurğulayır ki, qeyri-sabit beynəlxalq şəraitdə Böyük Britaniya daha dayanıqlı enerji sistemi qurmasa, Rusiyaya qarşı sanksiyaların yumşaldılması gələcək daha böyük problemlərin başlanğıcı ola bilər.
Poliqon.info
