Dövlət İmtahan Mərkəzi (DİM) magistraturaya qəbul imtahanını həm BMT-nin Ümumdünya Şəhərsalma Forumunun 13-cü sessiyasının açılış mərasimi ilə eyni tarixdə olması, həm də əlverişsiz hava şəraiti səbəbindən 14 iyun tarixində təkrar təşkil edəcək. İmtahan tarixinin beynəlxalq miqyaslı forumla eyni günə salınması isə haqlı narazılıqlara səbəb oldu.Bu sözləri BUTA.TV-a açıqlamasında təhsil eksperti İlqar Orucov 17 mayda keçirilən magistraturaya qəbul imtahanlarının təkrar təşkil olunmasını şərh edərkən deyib. Ekspertin sözlərinə görə, qurumlararası koordinasiyanın zəifliyi belə nəticəyə gətirib çıxardı: “WUF13 kimi qlobal miqyaslı tədbirin tarixi və logistika planları daha öncədən rəsmi şəkildə təsdiqlənir. Bununla bağlı təkcə dövlət qurumları deyil, vətəndaşlar da məlumatlı olur. Xüsusilə imtahan təşkil edən DİM-in bu tarixi nəzərə almaması strateji planlama və qurumlararası koordinasiyanın zəif olduğunu göstərir. Bakıda eyni gündə həm minlərlə xarici qonağın hərəkəti, həm də üç mindən çox tələbənin imtahan binalarına axınının nəqliyyat sistemində sıxlığa səbəb olacağı əvvəlcədən bəlli idi. Üstəlik gözlənilməz hava şəraiti də mövcud vəziyyəti daha da çətinləşdirdi. Ancaq DİM bütün prosesi öncədən analiz edərək imtahan vaxtını əvvələ və ya sonraya təyin edib, yarana biləcək bütün riskləri azalda bilərdi. Eyni zamanda, hər bir kütləvi imtahanın təşkili, binaların icarəsi, imtahan rəhbərləri və nəzarətçilərin qonorarı, imtahan vərəqlərinin çapı və s. kimi məsələlər böyük maliyyə vəsaiti tələb edir. Bununla da dövlət vəsaiti və resurslar qismən səmərəsiz xərclənmiş oldu. Təsəvvür edin, 14 iyunda keçirilməsi planlaşdırılan imtahan üçün dövlət və ya DİM-in öz büdcəsindən yenidən eyni miqdarda vəsait ayrılacaq. Əgər zamanında düzgün qərar verilsəydi, maliyyə yükü yaranmazdı. Bundan əlavə, tələbələr aylardır hazırlaşdıqları üçün imtahan günü emosional cəhətdən gərgin olurlar. Hətta tələbələr imtahanda iştirak etsə belə, yollarda qalma və gecikmə qorxusu ilə psixoloji gərginlik yaşayırlar. Bunun tələbəyə verdiyi zərəri kim ölçə bilər? Kim tələbənin imtahan nəticəsinin hansı səbəbdən zəif olduğunu deyə bilər? Burada insan faktorundan söhbət gedir. Düşünürəm ki, iyun ayında təkrar imtahan vermək şansı yaransa da, bu müddət tələbələrin imtahan stresini uzadır. Hətta onların qəbul planlarını ləngidir. Çünki burada diplom müdafiəsi və hərbi xidmət məsələləri var. Bir daha qeyd edirəm, imtahan tarixinin öncədən dəyişdirilməsi mümkün və zəruri addım idi. Gələcəkdə bu cür halların təkrarlanmaması üçün ölkədə keçirilən qlobal tədbirlərlə kütləvi imtahanların tarixi arasında inteqrasiya edilmiş vahid sistem qurulmalıdır”. İ.Orucovun fikrincə, təkrar imtahan hər kəs üçün ödənişsiz keçirilməlidir: “DİM imtahanda iştirak edə bilməyən və gecikən tələbələrə pulsuz imtahan təşkil edəcək. Digərləri isə 50 AZN ödəməklə yenidən imtahan verə biləcək. Ancaq imtahanda iştirak edən tələbələrdə gecikmə qorxusunun yaratdığı gərginliyin imtahana təsir göstərmədiyini kim sübut edə bilər? Yaxşı olar ki, DİM təkrar imtahanı hər kəs üçün ödənişsiz həyata keçirsin”. İmtahanın təşkil olunmasına ayrılmış vəsaitin miqdarı ilə bağlı DİM-ə sorğu ünvanlasaq da, suallarımıza cavab ala bilmədik. Xatırladaq ki, DİM-in verdiyi açıqlamada bildirilib ki, əlverişsiz hava şəraiti ilə əlaqədar baş verən fors-major hal nəzərə alınaraq Bakı, Abşeron və Sumqayıt şəhərlərində iyunun 14-də magistraturaya qəbul imtahanının ikinci cəhdi təkrar keçiriləcək.
