Ajans.az xarici mediaya istinadən xəbər verir ki, hadisə mayın 16-da Piedecuesta şəhərində baş verib. Məlumata görə, məşqdən qayıdan yeniyetməyə küçədə iki nəfər yaxınlaşıb və onun “bu məhəllədən olmadığını” bildiriblər. Bundan sonra hücum edən şəxslərdən biri məktəblini sinə nahiyəsindən bıçaqlayıb. Cinayətkarlar hadisə yerindən motosikletlə qaçıblar. Şahidlərin çağırdığı təcili yardım əməkdaşları yeniyetməni xəstəxanaya çatdırsalar da, həkimlər onun həyatını xilas edə bilməyiblər. Kristian Fabian Rondon Mendes yerli “Sporting” klubunun gənclər komandasında çıxış edirdi və perspektivli futbolçu hesab olunurdu. Yeniyetmənin anasının sözlərinə görə, oğlu uşaqlıqdan futbola böyük maraq göstərib və gələcəkdə Kolumbiyanın məşhur “America de Cali” klubunda oynamağı arzulayırdı.
Hadisədən sonra hüquq-mühafizə orqanları hücum edən şəxslərin saxlanılmasına kömək edəcək məlumat üçün 15 milyon Kolumbiya pesosu məbləğində mükafat elan edib.
