Moskva 64 mindən çox əsgərin iştirakı ilə böyük miqyaslı təlimlər keçirir...
Der Spiegel nəşri, Almaniya
Belarusda və Rusiyada hərbi qulluqçular nüvə silahının tətbiqini məşq edir. Moskvadakı Müdafiə Nazirliyi çərşənbə axşamı açıqladığı bəyanatda bildirib ki, Rusiya nüvə qüvvələri mayın 19-dan 21-dək təlimlər keçirəcək.
Bəyanata görə, təlimlərdə 64 mindən çox hərbi qulluqçu və 7 800 vahid silah-texnika iştirak edəcək. Rusiya ərazisində ballistik raketlərin və qanadlı raketlərin tətbiqinin məşq edilməsi planlaşdırılır.
Hələ bazar ertəsi günü Minskdəki Belarus Müdafiə Nazirliyi Belarus və Rusiyanın birgə təlimlər keçirəcəyini açıqlamışdı. Söhbət Belarus ərazisində nüvə silahının daşınması və tətbiqə hazırlanması ilə bağlı manevrilərdən gedir.
"Təlimlər zamanı nüvə döyüş sursatının çatdırılması və Rusiya tərəfi ilə əlaqəli şəkildə onların tətbiqə hazırlanması məsələlərinin işlənib hazırlanması planlaşdırılır", deyə Belarus Müdafiə Nazirliyi bəyanatında bildirib.
Planlaşdırılmış məşqin "üçüncü ölkələrə qarşı yönəldilmədiyi və regionun təhlükəsizliyinə təhdid təşkil etmədiyi" vurğulanıb. Təlimlərə hərbi-hava qüvvələri və raket birləşmələri cəlb edilib.
Ötən il Rusiya Belarusda nüvə başlığı daşıya bilən ən müasir hipersəs raketi "Oreşnik"i yerləşdirib. Prezident Aleksandr Lukaşenkonun 30 ildən artıqdır avtoritar idarəçilik etdiyi Belarus Moskvanın yaxın müttəfiqidir və iqtisadi, hərbi baxımdan ona böyük ölçüdə bağlıdır.
Ukrayna sərhəddəki qoşunlarını gücləndirir
Ukrayna bu təlimləri kəskin tənqid edib. Kiyevdəki Xarici İşlər Nazirliyi bazar ertəsi günü Belarusda taktiki nüvə silahlarının yerləşdirilməsinin qlobal təhlükəsizlik üçün "misli görünməmiş çağırış" olduğunu bəyan edib.
"Belarusu NATO sərhədlərindəki nüvə plasdarmına çevirməklə Kreml əslində nüvə silahının dünya miqyasında yayılmasını legitimləşdirir və digər avtoritar rejimlər üçün təhlükəli presedent yaradır", deyə bəyanatda qeyd edilib.
Kiyev hökuməti həmçinin Qərb müttəfiqlərini Moskva və Minskə qarşı sanksiyaları sərtləşdirməyə çağırıb. Belə hərəkətlər nüvə silahının yayılmaması rejiminə hörmət göstərən bütün dövlətlər tərəfindən birmənalı və qətiyyətlə pislənməlidir.
Keçən həftə Vladimir Zelenski ölkənin şimalında Belarus ilə sərhəddəki qoşunları gücləndirməyi tapşırmışdı. Səbəb kimi o, Rusiyanın yeni hücuma hazırlaşmasını göstərmişdi. Bazar ertəsi Kreml Zelenskinin ittihamlarını rədd edərək onları "daha da qızışdırmaq cəhdi" adlandırıb.
Poliqon.info
