Buna baxmayaraq, İtaliya bazarı istisnalıq təşkil edərək günü enişlə tamamlayıb...
Poliqon xəbər verir ki, Qərbi Avropa ölkələrinin fond indeksləri bazar ertəsi günü aparılan ticarət sessiyasını əsasən artımla başa vurub. İstisna olaraq yalnız İtaliya indikatorunda enişə meyl müşahidə edilib.
Avropa şirkətlərinin birləşdirilmiş indeksi Stoxx Europe 600 0,54% artaraq 610,17 xala çatıb. Britaniyada FTSE 100 1,26%, Almaniyada DAX 1,49%, Fransada CAC 40 0,44%, İspaniyada IBEX 35 isə 0,75% yüksəlib. İtaliyanın FTSE MIB indeksi isə 0,91% geriləyib.
İnvestorlar Yaxın Şərqdəki hadisələri izləməkdə davam edib. Bazarları müəyyən qədər dəstəkləyən amil ABŞ-Rusiya-İran münaqişəsinin nizamlanması ilə bağlı danışıqlara yenidən başlanılacağına dair ümidlər olub. KİV-lərin ABŞ-nin İrana tətbiq edilmiş sanksiyaları müvəqqəti dayandıra, münaqişənin həlli çərçivəsində isə tamamilə ləğv edə biləcəyini yazması, eləcə də Tehranın nüvə silahı əldə etməkdən imtina etməyə hazır olduğuna dair siqnallar bazara müsbət təsir göstərib. Bu xəbərlər neft qiymətlərinin qısamüddətli enişinə səbəb olsa da, qiymətlər sonradan bərpa edilib.
Neftin bahalaşması fonunda enerji şirkətlərinin səhm qiymətləri də artıb: BP Plc 2,7%, Shell 3,4%, TotalEnergies 2%, Equinor isə 1,1% qiymət qazanıb.
Stoxx Europe 600 indeksinin komponentləri arasında lider fransız Teleperformance şirkəti olub, onun səhmləri 8,4% qalxıb. Zəng mərkəzləri operatoru əvvəlcədən borcunun strukturunu optimallaşdırmaya yönəlmiş istiqraz refinansmanı proqramının başladılacağını açıqlamışdı. Dünyanın ən böyük eşitmə aparatları istehsalçısı Sonova cari maliyyə ilində xalis mənfəət və gəlirin artacağını proqnozlaşdırdıqdan sonra şirkətin səhm dəyəri 7,9% sıçrayış edib.
Reklam agentliyi Publicis-in səhmləri 6% bahalaşıb. Şirkət ABŞ-nin LiveRamp şirkətini 2,2 milyard dollara satın aldığını elan edib. Delivery Hero-nun səhm qiymətləri 5,6% artıb. Amerikalı Uber Technologies alman şirkətinə əlavə investisiyalar yatıracağını açıqlayıb. Bundan əlavə, Cənubi Koreya KİV-ləri Uber-in və ölkənin internet nəhəngi Naver-in Delivery Hero-ya məxsus Baemin ərzaq çatdırılması xidmətini 5,34 milyard dollara qədər məbləğə almaq istədiyini yazıb.
İrlandiyalı Ryanair Holdings Plc-nin bazar dəyəri 4,9% artıb. Avropanın ən böyük büdcə aviadaşıyıcısı 2026-cı maliyyə ilində gəlirini 11% artıraraq rekord xalis mənfəət qeydə alıb. İspaniyalı Repsol-un bazar dəyəri 4,3% yüksəlib — neft-qaz şirkəti Avstraliyalı Santos ilə birgə Alyaskadakı Pikka yatağında neft hasilatına başlayıb.
Almaniyada Thyssenkrupp AG-nin səhmləri 1,7% ucuzlaşıb: sənaye qrupu ABŞ-dəki zavodlarından birini bağlamağı planlaşdırdığını açıqlayıb. Commerzbank-ın qiymətli kağızları da 1,5% dəyər itirib — bank səhmdarlarını UniCredit SpA-nın satın alma təklifini rədd etməyə çağırıb.
London birjasında ən güclü artımı enerji şirkətləri göstərib: WPP 4,9%, Centrica 4,1%, National Grid isə 3,7% qiymət qazanıb. Frankfurtda isə Deutsche Boerse 4,7%, Rheinmetall 4,6%, Deutsche Telekom 4% yüksəlib. Alman DAX indeksinin tərkibində avtomobil istehsalçılarının səhmləri geriləyib: Porsche 0,9%, Mercedes-Benz 0,8%, BMW AG 0,4%, Volkswagen isə 0,2% ucuzlaşıb. Britaniyada FTSE 100 indeksinin enişdə olan ilk üçlüyünə 3i Group (-5,8%), Airtel Africa (-4,8%) və Mondi (-2,2%) daxil olub.
Poliqon.info
