Penitensiar Xidmətin 13 saylı cəzaçəkmə müəssisəsində cəza çəkən keçmiş deputat Nazim Bəydəmirli karserə salınıb.
Pravda.az-ın xəbərinə görə, bu barədə onun həyat yoldaşı Fəridə Bəydəmirli məlumat yayıb.
F.Bəydəmirli bildirib ki, buna səbəb N.Bəydəmirli və “Nehrəmli Sahib” kimi tanınan Sahib İbrahimov (Diasporla İş üzrə Dövlət Komitəsinin keçmiş sədri Nazim İbrahimov və tanınmış iş adamı Hacı İbrahim Nehrəmlinin qardaşıdır – red) arasında baş verən münaqişə olub: “Sahib İbrahimov Nazim Bəydəmirlini təxribata çəkib. Nazim rəhbərliyə ölçü götürülməsi ilə bağlı bir neçə dəfə müraciət edib. Nazim mənə telefonda dedi ki, narahat olma, həbsxana dövlətin qanunları ilə idarə olunmalıdır. Sonra Nazim Bəydəmirli karserə göndərilib. Səhhətində ciddi problemlər olduğu halda karseri fikirləşmək belə istəmirəm”.
