ABŞ dövlət katibi Marko Rubio bildirib ki, ABŞ prezidenti Donald Tramp İranın Yaxın Şərqdəki gərginliyin yaratdığı benzin qiymətlərinin artmasından istifadə edərək Vaşinqton üçün sərfəli olmayan bir razılaşma əldə etməsinə icazə verməyəcək.
Vətəninfo.az xəbər verir ki, Rubio NBC News-a verdiyi müsahibədə bildirib ki, “Prezident açıq şəkildə bildirib ki, əgər iranlılar daxili siyasətimizdən istifadə edərək ona pis bir razılaşma zorla qəbul etdirə biləcəklərini düşünürlərsə, bu baş verməyəcək”.
O xatırlatdı ki, ABŞ-da benzin qiymətlərinin cilovlanması üçün tədbirlər artıq görülüb və “onlar azalacaq”.
Çərşənbə axşamı Tramp İranla bağlı vəziyyətə görə amerikalıların maliyyə vəziyyətindən narahat olmadığını, çünki daha ciddi bir problemin – İranın nüvə silahı əldə etməsinin qarşısını almağa çalışdığını bildirib.
ABŞ prezidenti jurnalistlərə ABŞ vətəndaşlarının maliyyə vəziyyətinin pisləşməsinin onu İranla razılaşmaya vadar edib-etməyəcəyi ilə bağlı sualı cavablandırarkən bildirib ki, “Eybi yoxdur. İran məsələsində vacib olan tək şey onların nüvə silahına malik olmamasıdır”.
Tramp həmçinin İran hakimiyyəti “düzgün olanı etməsə”, “işi təkbaşına bitirəcəyi” ilə hədələyib. Onun sözlərinə görə, ABŞ “yalnız yaxşı bir razılaşma əldə edəcək”.
