Ştat baş prokuroru platformanın izləmə alqoritmləri və məlumat toplama metodlarını qanunsuz hesab edir...
Poliqon xəbər verir ki, ABŞ-nin Texas ştatı “Netflix” platformasına qarşı məhkəmə iddiası qaldıraraq servisin istifadəçilərin fəaliyyətini izlədiyini və asılılıq yaradan dizayn mexanizmlərindən istifadə etdiyini iddia edib. İddia ştatın baş prokuroru Ken Paxton tərəfindən irəli sürülüb.
Məlumata görə, iddiada “Netflix” Netflix platformasının istifadəçilərin kliklərini, baxış müddətini və baxılan məzmunla bağlı davranışlarını izlədiyi, həmçinin avtomatik olaraq növbəti seriyanı işə salma kimi funksiyalar vasitəsilə istifadəçi davranışını uzatdığı qeyd olunur.
Texas tərəfi hesab edir ki, bu cür mexanizmlər istifadəçilərin platformada daha uzun müddət qalmasına səbəb olur və onların rəqəmsal asılılıq riskini artırır. İddiada həmçinin istifadəçi məlumatlarının toplanması və emalı ilə bağlı şəffaflığın kifayət qədər olmadığı vurğulanır.
“Netflix” isə səsləndirilən bütün ittihamları rədd edib və platformanın istifadəçi təcrübəsini yaxşılaşdırmağa yönəlmiş standart sənaye praktikalarından istifadə etdiyini bildirib.
Ekspertlər bu işi ABŞ-da texnologiya şirkətlərinin məlumatların qorunması və alqoritmik dizaynlarına qarşı artan hüquqi təzyiqlərin bir hissəsi kimi qiymətləndirirlər.
Poliqon.info
