ABŞ Prezidenti Pekində keçiriləcək görüşlərdə ticarət və strateji məsələlərdə geniş iqtisadi açılım tələb edəcəyini bildirib...
Poliqon xəbər verir ki, ABŞ Prezidenti Donald Trump Çin Xalq Respublikasına səfəri çərçivəsində Çin lideri Si Tsinpinlə keçiriləcək danışıqlarda Pekindən ABŞ şirkətləri üçün Çin bazarının daha geniş şəkildə açılmasını tələb edəcəyini bildirib.
Tramp bu barədə “Truth Social” platformasında paylaşım edərək Çinə səfər edən böyük biznes nümayəndələrinin siyahısını da açıqlayıb. Onun sözlərinə görə, dünyanın aparıcı texnologiya və maliyyə şirkətlərinin rəhbərləri Çin bazarında daha geniş fəaliyyət imkanları əldə etməyə çalışırlar.
ABŞ Prezidenti bildirib ki, Çinlə aparılacaq danışıqlarda əsas prioritetlərdən biri xarici şirkətlər üçün məhdudiyyətlərin azaldılması və bazara çıxış imkanlarının genişləndirilməsidir. O qeyd edib ki, bu addım həm ABŞ iqtisadiyyatı, həm də Çin iqtisadiyyatı üçün “qarşılıqlı faydalı nəticələr” yarada bilər.
Məlumata görə, Trampın paylaşımında “Nvidia” şirkətinin rəhbəri Censen Huanq, “Apple” şirkətinin baş direktoru Tim Kuk, “BlackRock”un rəhbəri Larri Fink, “Blackstone”un icraçı direktoru Stiven Şvartsman, “Boeing” rəhbərliyindən Kelli Ortberq, “Cargill”dən Brayan Sayks, “Citi”dən Ceyn Freyzer, “GE Aerospace”dən Larri Kalp, “Goldman Sachs”dan Devid Solomon, “Micron”dan Sanjay Mehrotra və “Qualcomm”dan Kristian Amon kimi tanınmış biznes rəhbərlərinin də adı çəkilib.
Tramp əlavə edib ki, Çinlə iqtisadi əməkdaşlığın genişləndirilməsi həm qlobal ticarət sisteminə, həm də iki ölkə arasında strateji sabitliyə töhfə verə bilər. O, Si Cinpinlə görüşün “çox yaxın saatlarda” baş tutacağını bildirib və bu məsələni danışıqların əsas prioriteti kimi qaldıracağını vurğulayıb.
ABŞ Prezidenti həmçinin qeyd edib ki, Çin bazarının açılması yalnız iqtisadi deyil, eyni zamanda texnoloji inkişaf və innovasiya sahəsində də yeni imkanlar yarada bilər.
Poliqon.info
